30 دسمبر ، 2017 
کلبھوشن کا معاملہ؛ بھارت نے پاکستان میں تعنیات اپنے ہائی کمشنر کو وطن واپس بلالیا
30 دسمبر ، 2017
بھارت نے کلبھوشن یادیو کی والدہ اور اہلیہ سے پاکستان میں ہونے والی ملاقات کے حوالے سے مشاورت کے لیے پاکستان میں تعینات اپنے ہائی کمشنر کو وطن واپس بلالیا۔
بھارتی وزیر خارجہ سشما سوراج نے پاکستان میں تعینات بھارتی ہائی کمشنر اجے بساریا کو فوری طور پر نئی دہلی طلب کرلیا ہے جس کا مقصد بھارتی جاسوس کلبھوشن یادیو کی اس کی اہلیہ اور والدہ سے ملاقات پر مشاورت کرنا ہے۔
وطن واپسی کی ہدایات ملنے کے بعد پاکستان میں تعنیات بھارتی ہائی کمشنر اجے بساریا فوری طور پر نئی دہلی روانہ ہوجائیں گے۔
خیال رہے کہ پاکستان نے بھارتی خفیہ ایجنسی کے حاضر سروس افسر اور پاکستان میں دہشت گرد سرگرمیوں میں ملوث کلبھوشن یادیو کی درخواست پر اس کی اہلیہ اور والدہ سے 25 دسمبر کو ملاقات کرائی تھی۔
پاکستان نے یہ ملاقات انسانی ہمدردی کی بنیاد پر کرائی تھی تاہم بھارت نے پاکستان کی نیک نیتی پر شک کرتے ہوئے الزام عائد کیا تھا کہ پاکستان نے کلبھوشن کی اہلیہ اور والدہ کو ہراساں کیا اور اس ملاقات کو پروپیگنڈا کے لیے استعمال کیا گیا۔
پاکستان نے سختی سے بھارت کے ان الزامات کو مسترد کردیا تھا اور کہا تھا کہ اگر کلبھوشن کی اہلیہ اور والدہ کو پاکستان میں کوئی پریشانی ہوئی تو وہ اسی وقت یہ معاملہ اٹھاسکتی تھیں کیوں کہ ملاقات کے موقع پر میڈیا بھی موجود تھا۔
