سپریم کورٹ نے طلال چوہدری کو توہین عدالت کا نوٹس جاری کردیا

سپریم کورٹ آف پاکستان نے وزیر مملکت برائے داخلہ طلال چوہدری کو توہین عدالت کا نوٹس جاری کردیا۔

سپریم کورٹ کی جانب سے جاری نوٹس میں پاکستان مسلم لیگ (ن) کے رہنما طلال چوہدری کو 6 فروری کو سپریم کورٹ میں پیش ہونے کا حکم دیا گیا ہے۔

طلال چوہدری کےخلاف توہین عدالت کیس اوپن کورٹ میں مقرر کیا گیا ہے۔

ملکی تاریخ میں ہمیں بابا رحمت نہیں بابا زحمت ہی ملا: طلال چوہدری

زینب کے قاتلوں کو جس نے پکڑا ان کے لیے تالیاں بجیں گی ،عاصمہ اور نقیب کے قاتلوں کو پکڑیں ان کے لیے بھی تالیں بجائی جائیں گی، وزیر مملکت

سپریم کورٹ اعلامیے کے مطابق چیف جسٹس پاکستان جسٹس ثاقب نثار نے رجسٹرار سپریم کورٹ کے توجہ دلانے پر توہین عدالت کا نوٹس جاری کرنے کی ہدایت کی۔

ذرائع کے مطابق رجسٹرار سپریم کورٹ نے وزیر مملکت طلال چوہدری کی مختلف تقاریرکا حوالہ دیا کہ ان میں مبینہ طور عدلیہ کی تضحیک کی گئی ہے۔

چیف جسٹس نے ان تقاریر کا نوٹس لیتے ہوئے طلال چوہدری کو توہین عدالت کا نوٹس جاری کرنے کی ہدایت کی اور سماعت 6فروری کو مقرر کر دی۔

جب حدیبیہ جیسے کیس سنے جائیں گے تو نقصان اداروں کا ہوگا، طلال چوہدری

اگر کوئی چاہتا ہے کہ کیس دوبارہ کھلے تو یہ میرٹ نہیں بلکہ اس کا مطلب کچھ اور ہے، وزیر مملکت برائے داخلہ

طلال چوہدری نے سپریم کورٹ کی جانب سے سینیٹر نہال ہاشمی کے خلاف فیصلے پر رد عمل ظاہر کرتے ہوئے کہا تھا کہ سیاستدانوں کی نااہلی کا فیصلہ صرف عوام کی عدالت کرسکتی ہے ، اگر قانون کے مطابق فیصلے ہوتے تو عزت بڑھتی۔

انہوں نے یہ سوال بھی اٹھایا تھا کہ دیگر لوگوں کو بھی پکڑا جائے گا یا پھر صرف (ن) لیگ ہی ہدف ہے۔

نہال ہاشمی توہین عدالت کے مرتکب قرار، ایک ماہ قید کی سزا، 5 سال کیلئے نااہل

گزشتہ برس کراچی میں تقریر کےدوران عدلیہ مخالف تقریر کرنے والے سینیٹر نہال ہاشمی احاطہ عدالت سے گرفتار، 50 ہزار روپے جرمانہ بھی عائد

یاد رہے کہ سپریم کورٹ آف پاکستان نے (ن) لیگ کے سینیٹر نہال ہاشمی کو بھی توہین عدالت کا مرتکب قرار دیتے ہوئے ایک ماہ قید اور 50 ہزار روپے جرمانے کی سزا سنائی ہے جس جس کے بعد وہ 5 سال کے لیے نااہل ہوگئے ہیں۔

عدالتی فیصلے کے بعد پولیس سینیٹر نہال ہاشمی کو احاطہ عدالت سے گرفتار کرکے تھانہ سیکریٹریٹ لے گئی، جہاں ضروری کارروائی کے بعد انہیں اڈیالہ جیل منتقل کردیا گیا۔

سینیٹر نہال ہاشمی نے گزشتہ برس کراچی میں عدلیہ مخالف تقریر کی تھی، جس پر سپریم کورٹ نے توہین عدالت کا ازخود نوٹس لیا تھا۔