03 فروری ، 2018 
لیبیا کشتی حادثہ: 16 پاکستانیوں کی ہلاکت کی تصدیق ہو گئی، دفتر خارجہ
03 فروری ، 2018
لیبیا میں کشتی حادثے میں ڈوب کر جاں بحق ہونے والے 16 پاکستانیوں کی ہلاکت کی تصدیق ہو گئی ہے جن میں سے 12 لاشوں کی شناخت بھی کر لی گئی ہے۔
ترجمان دفتر خارجہ ڈاکٹر محمد فیصل کی جانب سے سوشل میڈیا پر لیبیا میں پیش آنے والے کشتی حادثے میں جاں بحق ہونے والے افراد کی فہرست جاری کی۔ جاں بحق ہونے والوں میں سے 8 کا تعلق گجرات، 4 کا منڈی بہاؤ الدین، ایک کا راولپنڈی اور ایک کا سرگودھا سے ہے۔
ڈاکٹر محمد فیصل نے بتایا کہ کشتی حادثے میں ڈوبنے والے 8 افراد کی لاشیں نکال لی گئی ہیں اور ان کی شناخت بھی ہو گئی ہے، دیگر چار لاشوں کی شناخت ان کے دوستوں نے کی ہے جب کہ دیگر افراد کے صرف کاغذات ملے ہیں۔ انہوں نے بتایا کہ پاکستانی سفارتخانہ اس حوالے سے مستقل کام کر رہا ہے۔
خیال رہے کہ گزشتہ روز بحیرہ روم کے ذریعے اٹلی جانے والی کشتی لیبیا کے ساحل پر الٹنے سے 90 افراد ڈوب گئے تھے جن میں کئی افراد کی لاشیں نکالی جا چکی ہیں جب کہ دیگر کی تلاش کا کام جاری ہے۔
