پاکستان نے عالمی واچ لسٹ میں نام ڈالے جانے کی بنیاد ہی ختم کر دی ہے، مفتاح اسماعیل

مشیر خزانہ مفتاح اسماعیل نے کہا کہ امریکا جس بنیاد پر پاکستان کا نام دہشت گردوں کو مالی معاونت فراہم کرنے والی عالمی واچ لسٹ میں شامل کروانا چاہتا ہے ہم وہ بنیاد ختم کر چکے ہیں۔

جیو نیوز کے پروگرام ’آج شاہزیب خانزادہ کے ساتھ‘ میں گفتگو کرتے ہوئے مشیر خزانہ مفتاح اسماعیل کا کہنا تھا کہ فائنانشل ایکشن ٹاسک فورس (ایف اے ٹی ایف) میں 37 ممالک ہوتے ہیں اور ہم 25 سے 30 ممالک سے رابطے میں ہیں، متعدد ممالک نے ہمارے اقدامات کو سراہا ہے۔

مفتاح اسماعیل نے کہا کہ ہم اپنا مؤقف دنیا کے سامنے رکھ رہے ہیں اور گزشتہ دو تین ہفتوں کے دوران تو ہم نے بہت اچھے اقدامات اٹھائے ہیں، جس بنیاد پر امریکا ہمیں عالمی واچ لسٹ میں شامل کرنا چاہتا تھا اس بنیاد کو ہی ہم نے ختم کر دیا ہے۔

امریکا پاکستان کو دہشت گردوں کی معاونت کرنیوالے ممالک کی لسٹ میں شامل کرانے کیلیے متحرک

اس معاملے پر برطانیہ، جرمنی اور فرانس کیساتھ کام کر رہے ہیں اور پر امید ہیں کہ امریکا نا مانا تو بھی نامزدگی واپس کروا لیں گے، مشیر خزانہ مفتاح اسماعیل

ان کا کہنا تھا کہ ہمارے اقدامات کے بعد کوئی تکنیکی وجہ نہیں ہے جس کی وجہ سے پاکستان کا نام واچ لسٹ میں شامل کیا جائے، مختلف ممالک کی جانب سے بھی ہمیں مثبت جواب مل رہا ہے لیکن افسوس کی بات یہ ہے کہ ایف اے ٹی ایف جیسی ایک بین الاقوامی تنظیم ایک ملک کی سازش کی وجہ سے اس قسم کی بات کر رہی ہے۔

انہوں نے کہا کہ پاکستان کے قوانین میں بھی سقم تھا لیکن جہاں تک قوانین میں تکنیکی چیزوں کا تعلق ہے تو ہم بات چیت کے لیے تیار ہیں لیکن جب ایسا محسوس ہو رہا ہو کہ پورا معاملہ بھارت سے متاثر ہو کر اٹھایا جا رہا ہے تو یہ افسوسناک ہے۔

مشیر خزانہ کا کہنا تھا کہ ہم نے اقوام متحدہ کے قوانین کے مطابق اپنے فرائض پورے کر دیے ہیں اور اب اب عالمی برادری اس معاملے کو دیکھنا ہے، تمام تر صورت حال کے باوجود ہندوستان جو چاہ رہا ہے وہ شرارت ہے۔

خیال رہے کہ گزشتہ روز یہ خبر سامنے آئی تھی کہ امریکا پاکستان کو دہشت گردوں کی معاونت کرنے والے ممالک کی عالمی واچ لسٹ میں شامل کرانے کے لیے متحرک ہو گیا ہے۔