دریائے سندھ پر بیسیوں ڈیم بنیں گے، کوئی یہ نہ سوچے کہ وہ رکاوٹ بنے گا، چیف جسٹس

لندن: چیف جسٹس آف پاکستان جسٹس ثاقب نثار نے واضح کیا ہے کہ پاکستان میں ڈیم کی تعمیر سے کوئی نہیں روک سکتا، کیونکہ یہ پاکستان کی بقا کے لیے ضروری ہیں۔

ڈیم کی تعمیر کے لیے لندن کے مقامی ہوٹل میں فنڈ ریزنگ تقریب سے خطاب کے دوران چیف جسٹس کا کہنا تھا کہ 'کالا باغ ڈیم کے معاملے میں پتا چلا کہ صوبوں میں اتفاق نہیں ہے تو سوچا کہ چلو بھائیوں میں تفرقہ ڈالنا مناسب نہیں، لیکن دیامر بھاشا اور مہمند ڈیم پر تمام صوبوں کا اتفاق ہے'۔

انہوں نے مزید کہا کہ 'مہمند اور دیامر بھاشا ڈیم کیوں نہیں بنے، اس سلسلے میں غفلت کس کی تھی آج پتا چل گیا، اب دریائے سندھ پر بھی بیسیوں ڈیم بنیں گے،کوئی یہ نہ سوچے کہ ڈیم کی تعمیر میں رکاوٹ بنے گا'۔

چیف جسٹس کا کہنا تھا کہ ڈیم کی تعمیر کا حکم سپریم کورٹ نے دیا ہے اور حکومت سپریم کورٹ کے حکم پر عمل درآمد کررہی ہے۔

ڈیم فنڈ پر بھیک مانگنے کا کہنے والوں کو شرم آنی چاہیے: چیف جسٹس

مخالفین کو کچھ نہیں ملا تو ڈیم کی تعمیر پر مخالفت شروع کردی، کم ظرف لوگ ہیں جو اس طرح کی سوچ رکھتے ہیں، جسٹس میاں ثاقب نثار

ساتھ ہی انہوں نے کہا کہ 'بلوچستان میں تعلیم، صحت اور پانی کےسنگین مسائل ہیں، صوبے میں پانی 2 ہزار فٹ پر ہے، اگر پانی کا مسئلہ فوری حل نہ ہوا تو لوگوں کو منتقل ہونا پڑسکتا ہے'۔

جسٹس ثاقب نثار کا کہنا تھا کہ پانی کی وجہ سے لوگوں کو زندگی سے محروم نہیں ہونے دیں گے کیونکہ پانی حیات ہے اور زندگی کا وجود پانی ہی سے ہے۔

ساتھ ہی انہوں نے واضح کیا کہ ڈیم کے لیےچندہ اکھٹا کرنا مقصد نہیں، آگاہی کے لیے مہم چلانا مقصد ہے۔

چیف جسٹس نے بتایا کہ ڈیم کے لیے ان کی نواسی نے بھی اپنی جمع پونجی سے حصہ ڈالا، حتیٰ کہ سپریم کورٹ کے جج کے بچوں نے بھی کھلونے بیچ کر7 ہزار روپے جمع کیے۔

ان کا کہنا تھا کہ 'یہ مہم بچوں کے ہاتھ میں آئے تو اسے کوئی نہیں روک سکتا'۔

ریٹائرمنٹ کے بعد ڈیم پر پہرہ دوں گا، چیف جسٹس پاکستان

ڈیم پاکستان کی بقا کے لیے ناگزیر ہیں، ہم سب کو بڑھ چڑھ کر ڈیمز فنڈ میں حصہ لینا چاہیے: جسٹس ثاقب نثار

تقریب کے دوران چیف جسٹس کا کہنا تھا کہ 'میں نے اپنے ملک میں بہت بے انصافی دیکھی ہے، میں نے لوگوں کو یتیموں اور بیواوؤں کے حق مارتے دیکھا ہے، انسانی حقوق کے ایسےمسائل ہیں جو انسان کو اندر سے تکلیف دیتی ہیں'۔

انہوں نے مزید کہا کہ 'ان کا کوئی سیاسی مقصد نہیں، عہدے سے رخصت ہوکر وہ فلاحِ انسانیت ہی کا کام کریں گے'۔

واضح رہے کہ چیف جسٹس اِن دنوں برطانیہ کے نجی دورے پر ہیں جہاں وہ مختلف شہروں میں فنڈ ریزنگ تقاریب میں شرکت کر رہے ہیں۔

دوسری جانب ڈیموں کی تعمیر کے لیے جیو نیوز انٹرنیشنل پر آج مانچسٹر سے براہ راست ٹیلی تھون بھی ہوگی۔