سرفراز کے نسلی تعصب پر مبنی جملوں پر پی سی بی بھی حرکت میں آگیا

ڈربن ون ڈے میں سرفرازاحمد کے نسلی تعصب پر مبنی جملوں کے 24 گھنٹے بعد پاکستان کرکٹ بورڈ (پی سی بی) بھی حرکت میں آگیا ہے۔

نسلی تعصب : سرفراز کی میچ ریفری کے سامنے پیشی، کارروائی کا امکان

سرفراز نے مؤقف اپنایا کہ نسلی تعصب کا تاثر درست نہیں، غیر ارادی طور پر جملہ منہ سے نکل گیا، میچ ریفری رنجن مدو گالے نے مزید کارروائی کیلئے رپورٹ آئی سی سی کو بھیج دی

اپنے ردعمل میں پی سی بی نے ڈربن واقعے پر افسوس کا اظہار کیا ہے اور واضح طور پر کہا ہے کہ بورڈ کسی بھی طرح کپتان سرفراز احمد کی حرکت کی حمایت کرتا ہے اور نہ اس قسم کے واقعات کی سرپرستی کرے گا کیوں کہ نسلی تعصب کے بارے میں بورڈ کی عدم برداشت کی پالیسی ہے۔

پی سی بی ترجمان کا کہنا ہے کہ پی سی بی نے نسل پرستی کے کسی بھی نظریے کا کبھی ساتھ نہیں دیا ہے۔ یہ واقعہ کھلاڑیوں کی اخلاقیات کے حوالے سے تربیت کی اہمیت اجاگر کرتا ہے اور مسقتبل میں اس قسم کے واقعات کی روک تھام کیلئے تربیتی پروگرام میں اضافے کی ضرورت ہے۔

’یہ مقصد نہیں تھا کہ میرے الفاظ سنے جائیں، مخالف ٹیم یا کرکٹ فینز تک پہنچ جائیں‘

کسی کو دکھی کرنے کا کوئی ارادہ نہیں تھا، میرے جملوں سے اگر کسی کی دل آزاری ہوئی تو میں معذرت چاہتا ہوں: سرفراز احمد

پی سی بی کے مطابق مستقبل میں اس قسم کے واقعات کی روک تھام کیلئے اخلاقیات کے حوالے سے تربیت کو یقینی بنایا جائے گا۔ پی سی بی نے امید ظاہر کی ہے کہ اس افسوس ناک واقعے کا جنوبی افریقا کی سیریز پر کوئی اثر نہیں پڑے گا۔ سیریز میں کئی کھلاڑیوں کی شاندار کارکردگی سامنے آئی ہے اور تماشائیوں کی بڑی تعداد کھیل کی اسپرٹ کو سامنے رکھتے ہوئےاسٹیڈیم کا رخ کرے گی۔ بقیہ میچوں میں بھی تماشائی کرکٹ کو سپورٹ کرتے ہوئے بڑی تعداد میں گراؤنڈ کا رخ کریں گے۔