13 فروری ، 2019 
امریکا اور طالبان کے درمیان مذاکرات کا اگلا دور پاکستان میں ہوگا
13 فروری ، 2019
امریکا اور طالبان کے درمیان مذاکرات کے اگلے دور کی میزبانی پاکستان کرے گا۔
ترجمان افغان طالبان نے کہا ہے کہ امریکا اور طالبان کے درمیان مذاکرات 18 فروری سے اسلام آباد میں ہوں گے۔
ترجمان افغان طالبان کا کہنا ہے کہ ان کا وفد وزیر اعظم عمران خان سے بھی ملاقات کرے گا جس میں وزیراعظم پاکستان سے پاک افغان تعلقات اور افغان مہاجرین سے متعلق امور پر بات ہو گی۔
خیال رہے کہ افغان طالبان اور امریکا کے درمیان مذاکرات کا پہلا دور پاکستان کی معاونت سے متحدہ عرب امارات میں ہوا تھا جب کہ فریقین کے درمیان مذاکرات کا دوسرا دور قطر کے دارالحکومت دوحا میں ہوا تھا۔
اس کے علاوہ افغان طالبان اور افغان اپوزیشن جماعتوں کے درمیان مذاکرات کا ایک دور روس کے دارالحکومت ماسکو میں بھی ہو چکا ہے۔
ان مذاکرات کا مقصد افغانستان میں گزشتہ 17 برسوں سے جاری جنگ کا خاتمہ اور مستقل امن کے لیے اقدامات کرنا ہے۔
