اعلیٰ عدلیہ کو جج کی مبینہ ویڈیو لیک کا نوٹس لینا چاہیے: وزیراعظم

وزیراعظم عمران خان کا کہنا ہے کہ اعلیٰ عدلیہ کو احتساب عدالت کے جج ارشد ملک کی مبینہ وڈیو لیک کا نوٹس لینا چاہیے۔

وزیراعظم عمران خان کی زیر صدارت حکومتی ترجمانوں کا اجلاس اسلام آباد میں ہوا جس میں ملک کی سیاسی اور معاشی صورتحال پر تبادلہ خیال کیا گیا۔

ذرائع کے مطابق وزیراعظم عمران خان کا کہنا تھا کہ ملکی وقار اور قومی اداروں پر حملے برداشت نہیں کیے جائیں گے، اداروں کو متنازع بنانے کی کسی بھی سازش کو کامیاب نہیں ہونے دیں گے۔

ذرائع کا بتانا ہے وزیراعظم کا اجلاس میں اظہار خیال کرتے ہوئے کہنا تھا کہ عدلیہ پر دباؤ اور حملے ن لیگ کا ماضی اور تاریخ رہے ہیں۔

نواز شریف کیخلاف فیصلہ دینے والے جج کو بلیک میل کیا گیا، مریم نواز ویڈیو سامنے لے آئیں

سزا دینے والا خود بول اُٹھا کہ نوازشریف کے ساتھ ناانصافی ہوئی، جج نے خود بتایا کہ انہیں کسی جگہ بُلا کر اُن کی اخلاق سے گری ہوئی ویڈیو دکھائی گئی، مریم نواز کی پریس کانفرنس

ذرائع کا کہنا ہے وزیراعظم کا کہنا تھا کہ یہ نیا پاکستان ہے اور اس میں عدلیہ اور ججز آزاد ہیں، حکومت کو جواب دہ نہیں ہیں۔

وزیراعظم کا کہنا تھا اپوزیشن حکومتی اقدامات پر اعتراضات اٹھا سکتی ہے اس لیے معاملہ عدلیہ پر چھوڑنا چاہتے ہیں۔

ذرائع کے مطابق عمران خان کا کہنا تھا اعلیٰ عدلیہ کو احتساب عدالت کے جج کی مبینہ ویڈیو لیک ہونے کا نوٹس لینا چاہیے، مبینہ ویڈیو کا فارنزک آڈٹ ضروری ہے، چاہتے ہیں عدلیہ حکم دے۔

وزیراعظم عمران خان کا کہنا تھا عدلیہ وڈیو لیک کا نوٹس لے، جو فیصلہ کرے حکومت مکمل سہولت دے گی۔

جج کو اسکینڈلائز کرنے پر قانونی کارروائی ہو سکتی ہے: فردوس عاشق

آڈیو ویڈیو کے مشکوک کردار کو بےنقاب کرنا حکومت کی ذمہ داری ہے، راجکماری کے الزامات کو منطقی انجام تک پہنچائیں گے: وزیراعظم کی معاون خصوصی

ذرائع کا کہنا ہے وزیراعظم کا کہنا تھا کہ اپوزیشن کوئی بھی ہتھکنڈا استعمال کر لے، احتساب کا عمل جاری رہے گا، نئے پاکستان میں اپوزیشن کا کوئی بھی حربہ کارگر ثابت نہیں ہو گا۔

ذرائع کا بتانا ہے وزیراعظم نے معاشی اقدامات پر حکومتی مؤقف واضح انداز میں پہنچانے کی ہدایت جاری کی۔

جج کی مبینہ آڈیو ویڈیو ٹیپ کا معاملہ

دو روز قبل مسلم لیگ ن کی نائب صدر مریم نواز نے پارٹی قائدین کے ہمراہ پریس کانفرنس کے دوران نواز شریف کے خلاف العزیزیہ ریفرنس کا فیصلہ سنانے والے احتساب عدالت کے جج ارشد ملک کی ایک مبینہ آڈیو ویڈیو ٹیپ جاری کی تھی جس میں وہ ن لیگ کے کارکن ناصر بٹ کو بتا رہے تھے کہ نواز شریف کے خلاف فیصلہ انہوں نے نہیں کیا بلکہ یہ فیصلہ ان سے کروایا گیا ہے۔

مریم نواز کی جانب سے دکھائی گئی ویڈیو جعلی، مفروضی اور جھوٹی ہے: جج ارشد ملک

ویڈیو میں گفتگو کو سیاق و سباق سے ہٹ کر پیش کرنے کی مذموم کوشش کی گئی، ملوث افراد کے ساتھ قانونی چارہ جوئی کی جائے، احتساب عدالت کے جج کی پریس ریلیز

گزشتہ روز احتساب عدالت کے جج ارشد ملک کی جانب سے جاری پریس ریلیز کے ذریعے مریم نواز کے الزامات کی سختی سے تردید کرتے ہوئے ان الزامات کو غلط، جھوٹ اور مفروضوں پر مبنی قرار دیا گیا۔

احتساب عدالت کے جج کی وضاحت پر مریم نواز نے سوشل میڈیا پر ٹوئٹ کرتے ہوئے کہا جج صاحب آپ کا بہت بہت شکریہ کہ آپ نے ویڈیو کی تردید نہیں کی۔

مریم نواز کی جانب سے احتساب عدالت کے جج کی مبینہ آڈیو ویڈیو ٹیپ کے معاملے پر وزیراعظم عمران خان کی معاون خصوصی برائے اطلاعات فردوس عاشق اعوان نے کہا کہ راجکماری کی جانب سے جاری کی گئی ویڈیو کا فارنزک آڈٹ ہونا چاہیے۔

’جج نے فیصلے کی طرح تیار شدہ پریس ریلیز پر بھی مجبوری میں دستخط کیے ہوں گے‘

تھینک یو ویری مچ، آپ نے ویڈیو کا انکار نہ کرکے ہمارے مؤقف کی تصدیق کردی: مریم نواز کی ٹوئٹ

سراج الحق کا جج ارشد ملک کی مبینہ ویڈیو پر جوڈیشل کمیشن بنانے کا مطالبہ

چیف جسٹس آف پاکستان مبینہ آڈیو ویڈیو کے معاملے پر سچ اور جھوٹ سامنے لائیں: امیر جماعت اسلامی