صحت و سائنس

فضائی آلودگی پھیپھڑوں کے ساتھ دماغ کو بھی متاثر کرتی ہے: تحقیق

10 جنوری ، 2020

اقوامِ متحدہ کے عالمی ادارہ برائے صحت کے مطابق دنیا میں تقریباً 2 کروڑ آبادی دماغی بیماری ’شیزوفرنیا‘ سے متاثر ہے۔

’شیزوفرنیا‘ ایک دماغی بیماری ہے جس میں انسان کی دماغی صحت متاثر ہونا شروع ہوجاتی ہے، اس بیماری سے متاثرہ افراد میں قبل از وقت موت کے خطرات عام لوگوں سے زیادہ ہوجاتے ہیں۔

اس بیماری کے حوالے سے محققین ابھی بھی تحقیق کر رہے ہیں کہ آیا اس بیماری ہونے کی اصل وجہ کیا ہو سکتی ہے۔

ڈنمارک کی آرہس یونیورسٹی کی جانب سے حال ہی میں ایک تحقیق کی گئی ہے جس میں انہوں نے دماغی بیماری کی ایک وجہ بچپن سے ہی زائد فضائی آلودگی کا سامنا کرنے کو ٹہھرائی ہے۔

یہ بھی پڑھیں

تحقیق کے مطابق فصائی آلودگی نا صرف انسان میں پھیپھڑوں کے کینسر اور دمے جیسی بیماری کا باعث بنتی ہے بلکہ دماغی صحت کو بھی متاثر کرتی ہے۔

میڈیکل نیوز ٹوڈے کی رپورٹ کے مطابق فضائی آلودگی آگے جاکر یاداشت کھونے کا بھی باعث بنتی ہے، حالیہ تحقیق نے اس بات کی نشاندہی کی ہے کہ فضائی آلودگی سے دماغی کارکردگی اور دماغی صحت متاثر ہونے کے خطرات میں اضافہ ہوتا ہے۔

تحقیق کے سینئر محقق ہینریٹ ہورسڈل کا کہنا ہے کہ تحقیق سے یہ بات واضح ہوئی ہے کہ زائد فضائی آلودگی شیزوفرنیا کے خطرات میں بھی زیادہ اضافہ کرتی ہے۔

محققین نے اس حوالے سے مزید وضاحت کرتے ہوئے بتایا کہ ایسے لوگ جو زائد فضائی آلودگی والے علاقوں میں رہتے ہیں ان میں دماغی بیماری کے خطرات میں 3 فیصد اضافہ ہوجاتا ہے۔