چین سے شہریوں کو واپس لائے تو کورونا وائرس روک نہیں سکیں گے: ظفر مرزا

وزیراعظم عمران خان کے معاون خصوصی برائے صحت ظفر مرزا نے کہا ہے کہ عالمی ادارہ صحت نے خبردار کیا ہے کہ چین میں موجود پاکستانی شہریوں کو وطن واپس لائے تو کورونا وائرس کے پھیلاؤ پر قابو ممکن نہیں رہے گا۔

چین کے ساتھ سرحدیں بند کرنے سے کورونا وائرس مزید تیزی سے پھیلے گا، ڈبلیو ایچ او

کورونا وائرس سے چین میں اب تک 213 افراد ہلاک جبکہ تقریباً 10 ہزار متاثر ہوچکے ہیں اور یہ وائرس دنیا کہ 20 ممالک تک پھیل چکا ہے

اسلام آباد میں قومی اسمبلی کی قائمہ کمیٹی برائے صحت کے اجلاس میں کورونا وائرس کے حوالے سے معاون خصوصی برائے صحت ظفر مرزا نے بتایا کہ ہمارے پاس بیماریوں سے بچنے سے متعلق کوئی بھی سہولت نہیں، پاکستانی طلبہ کی صحت اور دیگر سہولیات کے حوالے سے مسلسل حکومتِ چین سے رابطے میں ہیں۔

انہوں نے کہا کہ کورونا وائرس سے چین میں متاثرہ چاروں پاکستانیوں کی حالت میں بہتری آ رہی ہے، چین کی حکومت پاکستانی طلبہ کو مکمل تحفظ اور بہتر سہولیات فراہم کر رہی ہے۔

ان کا کہنا ہے کہ چین کی فلائٹس 3 فروری سے دوبارہ شروع ہو جائیں گی، اس کے لیے تمام ائیرپورٹس اور اسپتالوں میں مؤثر چیک اپ کے انتظامات کر رہے ہیں، مشتبہ مسافروں کو مزید چیک اپ کے لیے نگہداشت میں رکھا جائے گا۔ 

ڈاکٹر ظفر مرزا نے بتایا کہ قومی ادارہ صحت کے لیے پرائمر کٹ فلائٹ منسوخی کے سبب نہیں پہنچ سکی، پرائمر کی حوالگی سے پاکستان میں ہی کورونا کی تشخیص ممکن ہو جائے گی۔

یاد رہے کہ کورونا وائرس سے چین میں اب تک 213 افراد ہلاک جبکہ تقریباً 10 ہزار افراد متاثر ہوچکے ہیں اور یہ وائرس چین سے نکل کر اس وقت دنیا کہ 20 ممالک تک پھیل چکا ہے۔

اپوزیشن نے چین میں پھنسے پاکستانیوں کی وطن واپسی کا مطالبہ کردیا

سینیٹ میں پی پی، ن لیگ اور پختونخوا ملی عوامی پارٹی کے سینیٹرز کا حکومت سے شہریوں کی واپسی کا مطالبہ، سی ون تھرٹی سے شہریوں کو لایا جائے: رحمان ملک

کورونا وائرس سے سب سے زیادہ متاثرہ شہر ووہان میں 500 سے زائد پاکستانی طلبہ موجود ہیں جن میں سے 4 میں اِس وائرس کی تصدیق ہوئی ہے جبکہ کئی طلبہ نے حکومت سے انہیں ووہان سے نکالنے کی اپیل کی ہے تاہم حکومت کی جانب سے طلبہ کو چین نہ نکالنے کا فیصلہ کیا گیا ہے۔ 

اس سلسلے میں سینیٹ میں اپوزیشن نے بھی حکومت سے چین میں پھنسے پاکستانیوں کو وطن واپس لانے کا مطالبہ کیا ہے۔