کورونا وائرس: سعودی عرب میں عمرہ زائرین کے داخلے پر پابندی میں توسیع
04 مارچ ، 2020
کورونا وائرس پھیلنے کے خدشے کے پیش نظر سعودی عرب نے عمرہ زائرین کے داخلے پر عارضی پابندی میں مزید توسیع کردی۔
چین سے پھیلنے والے وائرس سے دنیا کے 65 سے زائد ممالک متاثر ہوئے ہیں اور سعودی عرب میں بھی وائرس کے دو کیسز کی تصدیق ہوچکی ہے۔
کیس کی تصدیق سے قبل ہی سعودی حکومت نے حفاظتی اقدامات شروع کردیے تھے جس کے تحت عمرہ زائرین اور وزٹ ویزا پر سعودی عرب آنے والے افراد پرپابندی عائد کردی گئی تھی۔
ذرائع کے مطابق سعودی حکومت نے 16 دن کی عارضی پابندی میں توسیع کرتے ہوئے اسے 31 مارچ تک کردیا ہے۔
ذرائع کا کہنا ہےکہ سعودی فضائی کمپنی نے تمام ٹکٹ منسوخ کر دیئے ہیں اور منسوخ شدہ ٹکٹوں کی ری فنڈنگ کےلیےسعودی ائیرلائن سیلز سپورٹ سینٹر سےرابطہ کرنے کی ہدایت کی گئی ہے۔
واضح رہے کہ متاثرہ سعودی شہری ایران سے بذریعہ بحرین سعودی عرب میں داخل ہوا تھا جس کے بارے میں مزید تفصیلات سامنے نہیں لائی گئی ہیں۔
سعودی وزارت صحت کے حکام کے مطابق متاثرہ شہری کو اسپتال میں آئسولیشن وارڈ میں رکھا گیا ہے جہاں اس کا علاج جاری ہے۔
