15 مارچ ، 2020 
کورونا سے بچاؤ کے حکومتی اقدامات کی گواہی عالمی ادارہ صحت بھی دے رہا ہے: فردوس عاشق
15 مارچ ، 2020
وزیراعظم کی معاون خصوصی برائے اطلاعات فردوس عاشق اعوان کا کہنا ہے کہ کورونا وائرس سے بچاؤ کے لیے ہمارے بروقت اقدامات کی گواہی عالمی ادارہ صحت (ڈبلیو ایچ او) بھی دے رہا ہے۔
معاون خصوصی برائے اطلاعات کی جانب سے جاری بیان میں کہا گیا ہے کہ کورونا سے نبرد آزما ہونے کے لیے حکومت نے عوام کے مفاد اور تحفظ کے لیے اقدامات کیے ہیں۔
فردوس عاشق اعوان نے کہا کہ قومی یکجہتی اور ہم آہنگی کے ساتھ ایک ہو کر اس وائرس کو شکست دیں گے۔
انہوں نے کہا کہ مشکل وقت ہے لیکن ہماری قوم ہر آزمائش میں سرخرو ہوئی ہے۔
ان کا کہنا ہے کہ کورونا سے بچاؤ کے لیے ہمارے بروقت اقدامات کی گواہی ڈبلیو ایچ او بھی دے رہا ہے۔
فردوس عاشق اعوان نے مزید کہا کہ وزیراعظم کورونا وائرس کے تدارک کے لیے اقدامات کی خود نگرانی کر رہے ہیں، عوام ہدایات اور احتیاطی تدابیر پر لازمی عمل کریں۔
خیال رہے کہ پاکستان میں کورونا وائرس کے 34 مریض سامنے آ چکے ہیں جس میں سے 17 سندھ، 10 بلوچستان، 4 اسلام آباد اور 3 گلگلت بلتستان میں ہیں۔
مزید خبریں :
ملتان میں فضائی معیار آج بھی انتہائی مضر صحت
8 منٹ پہلے
کراچی: مٹی کا تودہ گرنے سے 2 مزدور جاں بحق، ایک زخمی
9 گھنٹے پہلے
