نیٹ فلکس بھی کورونا وائرس کی زد میں آگیا

20 مارچ ، 2020

کورونا وائرس نے دنیا بھر میں تمام تر نظام کو متاثر کردیا ہے جب کہ وائرس نے جہاں معیشت کو تباہ کیا ہے وہیں اس کی وجہ سے لوگ اپنے گھروں میں محصور ہو کر رہ گئے ہیں۔

کورونا وائرس کی وجہ سے مقبول ترین آن لائن اسٹریمنگ سائٹ نیٹ فلکس نے بھی اہم فیصلہ کیا ہے۔

معروف اسٹریمنگ سائٹ نیٹ فلکس نے ہائی ڈیفینیشن ویڈیوز کے معیار کو کم کرنے کا فیصلہ کیا ہے تاکہ اس سے انٹرنیٹ پر پڑنے والا بوجھ کم کیا جاسکے۔

غیر ملکی خبر رساں ادارے کے مطابق نیٹ فلکس نے یورپ میں 30 دن کے لیے اسٹریمنگ کے معیار کو کم کردیا ہے، یہ فیصلہ کورونا وائرس کے باعث انٹرنیٹ پر دباؤ میں کمی کرکے صارفین کے لیے نیٹ فلکس کی دستیابی یقینی بنانے کے لیے کیا گیا ہے۔

یہ بھی پڑھیں

خیال رہے کہ چین کے شہر ووہان سے پھیلنے والے کورونا وائرس سے سب سے زیادہ یورپ متاثر ہے جہاں ہلاکتوں کی تعداد نے چین کو بھی پیچھے چھوڑ دیا ہے۔

اٹلی میں اس وقت لاک ڈاؤن جاری ہے اور ڈیڑھ کروڑ سے زائد افراد کو قرنطینہ میں رکھا گیا ہے۔

حکومت کی جانب سے ملک بھر میں کسی بھی قسم کے اجتماع اور غیر ضروری طور پر گھر سے نکلنے کی بھی اجازت نہیں ہے جس کے باعث کورونا وائرس سے مرنے والے افراد کی تجہیز و تدفین میں بھی مشکلات کا سامنا ہے۔

کورونا وائرس نے اب پوری دنیا کو لپیٹ میں لے لیا ہے اور اس سے اب تک 10 ہزار سے زائد اموات ہو چکی ہیں جب کہ دنیا بھر میں وائرس سے متاثرہ افراد کی تعداد 2 لاکھ 40 ہزار سے تجاوز کرگئی ہے۔