'حکمران کورونا سے بچاتے بچاتے بھوک سے کیوں مارنا چاہتے ہیں؟'

کورونا وائرس کی وجہ سے عملی طور پر لاک ڈاؤن کو تقریباً دو ہفتے ہونے کو ہیں لیکن دیہاڑی دار مزدور کو نہ تو حکومت سے راشن کا کوئی دانہ ملا نہ ہی پیسہ، غریب کہتے ہیں کہ حکمران کرونا سے بچاتے بچاتے بھوک سے کیوں مارنا چاہتے ہیں؟

کورونا وائرس سے بچاؤ کے لیے کہیں مکمل اور کہیں جزوی لاک ڈاؤن جاری ہے، تقریباً دو ہفتوں سے مزدور بے روگار اور بے یار ومدد گار ہیں، حکومتی اقدامات ابھی تک محض امداد کے اعلانات اور تسلیوں تک ہی محدودہیں، غریب کو سرکار کی طرف سے ایک دانہ کھانے کو ملا نہ ہی کوئی پیسہ، اب بھوک سےموت دکھائی دے رہی ہے۔

لاک ڈاؤن کے باعث مزدور وں کے بچے سوکھی روٹی پانی میں ڈبو کر کھانے پر مجبور

لاک ڈاؤن کی وجہ سے کاروبار مکمل طور پر بند ہیں جس کی وجہ سے دیہاڑی دار اور مزدور طبقہ سب سے زیادہ متاثرہ ہو رہا ہے۔

مزدوروں کا کہنا ہے کہ کورونا سے بھی مرنا ہے اور بھوک سے بھی مرنا ہے، بچوں روتا کیسے دیکھیں، بچے کبھی سوکھی کھا رہے ہیں کبھی دال۔

موجودہ صورتحال میں کچھ مخیر حضرات اپنے طور پر مستحق افراد میں امداد تقسیم کر رہے ہیں مگر اطلاع ملتے ہی لوگوں کا رش لگ جاتا ہے ، پھر کون سا کورونا اور کیسی احتیاط اور عزت نفس تو گئی بھاڑ میں۔

ایسے ہی امداد لینے آنے والی خواتین نے بتایا کہ ' ہم عزت دار عورتیں ہیں،گھر میں کھانے کو کچھ نہیں تھا تو ادھر آئی ہیں'۔

چلچلاتی دھوپ، ایک کلو میٹر لمبی قطار اور پُل سر کریں تو ہی سرکاری امداد ملے گی

سندھ حکومت کا اعلان تھا کہ شہریوں کو امداد ان کے گھر کے دروازے پر ملے گی اورلوگوں کی عزت نفس کا خیال رکھا جائے گا

حکومت نے مستحق افراد کو گھروں میں راشن پہنچانے کے لیے ٹائیگر فورس کی رجسٹریشن شروع کر دی ہے ،بے روز گار وں کے لیے ایس ایم ایس کے ذریعے رجسٹریشن کی جا رہی ہےمگر دیہاڑی دار مزدور سوال کررہا ہے کہ کہ کب دیں گے راشن؟ کب ملے گی امداد؟ مٹ جائے گی مخلوقِ خدا تو انصاف کرو گے؟