ایکسپو سینٹر آئسولیشن مرکز میں کورونا کے مریضوں کی آمد شروع

کراچی: ایکسپو سینٹر کراچی میں پاک فوج کی مدد سے تیار کردہ فیلڈ آئسولیشن سینٹر میں اب تک کورونا وائرس سے متاثر پانچ مریضوں کو داخل کیا جا چکا ہے اور ہر گزرتے گھنٹے کے ساتھ ان کی تعداد بڑھتی جا رہی ہے۔

محکمہ صحت سندھ کے ایک اعلیٰ افسر نے بتایا کہ محکمہ صحت سندھ نے پیر سے ایکسپوسینٹر میں قائم فیلڈ آئسولیشن سینٹر میں کورونا وائرس کے ایسے مریضوں کو داخل کرنا شروع کر دیا تھا جن میں مرض کی علامات یا تو بالکل نہیں تھی یا بہت ہی ہلکی تھیں۔

کراچی ایکسپو سینٹر میں 1200 بستروں پر مشتمل فیلڈ آئسولیشن سینٹر کا افتتاح

آئسولیشن سینٹرز کو ڈبلیو ایچ او کے تجویز کردہ اصولوں کے مطابق تیار کیا گیا ہے۔

محکمہ صحت کے افسر کا کہنا تھا کہ اب تک ایکسپوسینٹرمیں کورونا وائرس سے متاثرہ 5 مریضوں کو لایا جا چکا ہے جبکہ کہ مزید مریضوں کی آمد جاری ہے۔

حکام کے مطابق ایکسپو سینٹر کراچی میں قائم فیلڈ آئسولیشن سینٹر میں مریض کراچی کے 6 اضلاع کے ڈسٹرکٹ ہیلتھ افسران کی جانب سے بھیجے جا رہے ہیں۔

محکمہ صحت کے حکام کے مطابق کراچی میں روزانہ 50 کے قریب افراد کورونا وائرس کا شکار ہو رہے ہیں اور ان میں سے اکثر متاثرین میں مرض کی علامات یا تو نہ ہونے کے برابر ہوتی ہیں یا انہیں بہت ہی ہلکی کھانسی یا بخار ہوتا ہے جس کا علاج صرف یہ ہے کہ انہیں آئسولیشن سینٹر میں منتقل کر دیا جائے تاکہ وہ دیگر صحت مند لوگوں کو متاثر نہ کر سکیں۔

ملک میں کورونا سے مزید3 اموات، ہلاکتیں 55 ہوگئیں، مجموعی کیسز 4007تک جا پہنچے

آج کورونا کے اب تک مزید 252 کیسز سامنے آچکے ہیں جب کہ 3 ہلاکتیں بھی رپورٹ ہوئیں جن میں سے اسلام آباد سے پہلی ہلاکت سامنے آئی

ایکسپو سینٹر کراچی میں قائم فیلڈ آئسولیشن سینٹر میں اس وقت 200 بستروں پر مشتمل آئسولیشن سینٹر بنایا گیا ہے جس کی تعداد پہلے مرحلے میں 600 بیڈز اور آخری مرحلے میں 1200 بیڈز تک بڑھائی جاسکتی ہے۔

حکام کے مطابق فیلڈ آئسولیشن سینٹر میں دو کریٹیکل کیئر یونٹس بھی بنائے گئے ہیں جہاں پر درمیانے درجے کی علامات والے مریضوں کو رکھا جائے گا جبکہ تشویش ناک حالت میں ان مریضوں کو ڈاؤ یونیورسٹی کے اوجھا اسپتال سمیت مختلف سرکاری اسپتالوں میں علاج کے لیے روانہ کر دیا جائے گا۔