30 اپریل ، 2020 
ڈپٹی اسپیکر پنجاب اسمبلی نے کورونا ایس او پیز کی دھجیاں اڑا دیں
30 اپریل ، 2020
لاہور: کورونا وائرس کے پیش نظر بیرون ملک سے آنے والے مسافروں کا کورونا ٹیسٹ اور 14 دن کا قرنطینہ لازمی قرار دیا گیا ہے لیکن ڈپٹی اسپیکر پنجاب اسمبلی ملتان ائیر پورٹ پر کورونا ایس او پیز کو نظر انداز کرتے ہوئے لاہور روانہ ہو گئے۔
ملتان ائیرپورٹ پر گزشتہ روز دبئی سے پرواز آئی جس میں 145 مسافر سوار تھے اس پرواز میں ڈپٹی اسپیکر پنجاب اسمبلی دوست محمد مزاری بھی ملتان پہنچنے لیکن وہ کورونا ٹیسٹ کروائے بغیر لاہور روانہ ہو گئے۔
ڈپٹی اسپیکر کے ہمراہ 2 قریبی رشتے دار بھی ان کے ساتھ لاہور روانہ ہو گئے۔
اے ڈی سی قمر زمان کے مطابق ڈپٹی اسپیکر کو نجی ہوٹل میں قرنطینہ کرنے کی پیش کش کی گئی لیکن انہوں نے انکار کر دیا اور محکمہ داخلہ کی ہدایت پر انہیں لاہور جانے کی اجازت دی گئی۔
اے ڈی سے نے بتایا کہ دوست مزاری لاہور میں قرنطینہ پوراکریں گے جب کہ دیگر مسافروں کو قرنطینہ سینٹر منتقل کر دیا گیا ہے۔
