10 مئی ، 2020 
کورونا وائرس پارلیمنٹ کی راہداریوں میں بھی پہنچ گیا: ڈپٹی چیئرمین سینیٹ
10 مئی ، 2020
ڈپٹی چیئرمین سینیٹ سلیم مانڈوی والا نے کہا ہے کہ کورونا وائرس پارلیمنٹ کی راہداریوں میں بھی پہنچ گیا ہے جبکہ ارکان پارلیمنٹ اور عملے میں کورونا کی تشخیص باعث تشویش ہے۔
خیال رہے کہ پیر کو قومی اسمبلی اور منگل کو سینیٹ کا اجلاس طلب کیا گیا ہے جہاں کورونا صورتحال پر بحث کی جائے گی جبکہ ضابطہ کار کے تحت اجلاس میں شرکت کے لیے ارکان پارلیمنٹ کا کورونا ٹیسٹ لازمی قرار دیا گیا ہے۔
متعدد ارکان پارلیمنٹ نے اجلاس میں شرکت کے لیے ٹیسٹ کرائے ہیں جن کے نمونے این آئی ایچ عملے نے حاصل کیے تھے۔
اپنے بیان میں ڈپٹی چیئرمین سینیٹ سلیم مانڈوی والا کا کہنا تھا کہ کورونا وائرس پارلیمنٹ کی راہداریوں میں بھی پہنچ گیا ہے جبکہ ارکان پارلیمنٹ اور عملے میں کورونا کی تشخیص باعث تشویش ہے
انہوں نے کہا کہ مزید ارکان اور عملے میں کورونا کی تشخیص ہونے کا خدشہ ہے اور کورونا کیسز میں اضافے سے متعلق میرے خدشات درست ثابت ہو رہے ہیں۔
ان کا کہنا ہے کہ بروقت خبردار کردیا تھا کہ ٹیسٹ کے بغیر کسی کو پارلیمنٹ میں داخل نہ ہونے دیا جائے لہٰذا موجودہ صورتحال میں اجلاس بلانے کے خطرناک نتائج نکل سکتے ہیں۔
ڈپٹی چیئرمین سینیٹ نے کہا کہ ضروری ہو تو اجلاس میں تاخیر کی جائے اور ٹیسٹ کو یقینی بنانے کے بعد ہی پارلیمنٹ میں داخلے کی اجازت دی جائے۔
واضح رہے کہ گزشتہ دنوں اسپیکر قومی اسمبلی اسد قیصر میں بھی مہلک وائرس کی تشخیص ہوئی تھی اور وہ اس وقت زیرعلاج ہیں۔
مزید خبریں :
ملتان میں فضائی معیار آج بھی انتہائی مضر صحت
3 گھنٹے پہلے
ایرانی وزیر خارجہ دو روزہ سرکاری دورے پرپاکستان پہنچ گئے
10 گھنٹے پہلے
