25 مئی ، 2020 
تحقیقاتی ٹیم میں کسی متعلقہ ادارے کے افراد شامل نہیں ہوں گے، ترجمان پی آئی اے
25 مئی ، 2020
کراچی میں پاکستان انٹرنیشنل ائیرلائنز (پی آئی اے) کے طیارے کو پیش آنے والے حادثے کے حوالے سے پی آئی اے کے ترجمان کا کہنا ہے کہ تحقیقاتی ٹیم میں کسی متعلقہ ادارے کے افراد شامل نہیں ہوں گے، صرف طلب کی گئی معلومات ،دستاویزات یا ریکارڈ فراہم کریں گے۔
ترجمان کا کہنا ہے کہ ائیربس نے ائیر کریش میں مہارت رکھنے والی 10 رکنی تکنیکی ٹیم کو تحقیقات سے منسلک کردیا ہے، وزیر اعظم کی خواہش ہے رپورٹ قلیل مدت میں منظر عام پر لائی جائے۔
ترجمان پی آئی اے کے مطابق ائیرکرافٹ ایکسیڈنٹ انوسٹیگشن بورڈ نے طیارے کے حادثے کا تحقیقاتی عمل شروع کردیا ہے۔
خیال رہے کہ حادثے میں جاں بحق ہونے والے جہاز کے پائلٹ کیپٹن سجاد گل کے والد گل محمد بھٹی پی آئی اے کی انتظامیہ پر برس پڑے ہیں۔
سجاد گل کے والد کا کہنا ہے کہ پی آئی اے والے خود ہی انکوائری کررہے ہیں اور خود ہی فیصلے بھی کررہے، پی آئی اے کی انکوائری پر اعتبار نہیں۔
22 مئی کو پیش آنے والے حادثے میں 97 افراد جاں بحق اور 2 زندہ بچ گئے تھے۔
