پولیس حراست میں سیاہ فام شخص کی ہلاکت کیخلاف احتجاج پورے امریکا میں پھیل گیا

امریکا کی ریاست منی سوٹا میں سیاہ فام شخص جارج فلوئیڈ کے قتل کے ملوث پولیس افسر ڈیریک چوائن کو گرفتار کرلیا جبکہ ہلاکت کیخلاف احتجاج کا دائرہ پورے امریکا میں پھیل گیا ہے۔

ریاست مِنی سوٹا کے شہر مینی پولِس میں پولیس کے ہاتھوں سیاہ فام شہری کی ہلاکت کے بعد ہنگامے پھوٹ پڑے تھے اور مشتعل مظاہرین نے جلاؤ گھیراؤ بھی کیا تھا۔

امریکا: سیاہ فام شخص کی ہلاکت کیخلاف احتجاج، پولیس اسٹیشن نذر آتش

ریاست کے گورنر ٹم والز نے شہر میں ہنگامی حالت نافذ کرتے ہوئے 500 نیشنل گارڈز تعینات کردیے ہیں

سیاہ فام شخص کی ہلاکت پر مظاہروں کا سلسلہ چوتھے روز بھی جاری رہا جس کے باعث پولیس اور مظاہرین میں آنکھ مچولی ہوتی رہی۔

احتجاج کے باعث مینی پولِس میں رات 8 بجے سے صبح 6 بجے تک کرفیو نافذ کردیا گیا ہے جبکہ ریاستی گورنر ٹم والز کی جانب سے نیشنل گارڈز کی مزید نفری بھی تعینات کردی گئی ہے۔

گورنر کی جانب سے احتجاج سے سختی سے نمٹنے کی وارننگ جاری کی گئی ہے۔

دوسری جانب سیاہ فام جارج فلوئیڈ کے قتل کے الزام میں سابق پولیس افسر ڈیریک چوائن کو گرفتار کرلیا ہے، ملزم پر قتل اور تشدد کا مقدمہ درج کیا گیا ہے۔ ڈیریک چوائن اور دیگر تین پولیس اہلکاروں کو اس واقعے کے بعد برطرف کردیا گیا تھا۔

غیرملکی خبررساں ادارے کے مطابق مقامی عدالت نے گرفتار ملزم ڈیریک چوائن کی ضمانت کیلئے  5 لاکھ ڈالر کی رقم مقرر کی ہے۔

امریکا میں پولیس حراست میں سیاہ فام شخص کی ہلاکت کے بعد ہنگامے

مظاہرین کو منتشر کرنے کیلئے آنسو گیس اور ربڑ کی گولیوں کا استعمال، مظاہرین نے پولیس اہلکاروں اور پولیس اسٹیشن کی عمارت پر پتھراؤ کیا

اُدھر سیاہ فام شہری کی ہلاکت کے خلاف امریکا بھر میں احتجاج شروع ہوگیا ہے اور کئی ریاستوں میں شدید احتجاج کیا گیا۔

شکاگو میں بھی پولیس اور مظاہرین کے درمیان جھڑپیں ہوئیں  پتھراؤ سے کئی پولیس اہلکار زخمی ہوئے۔

پولیس کے مطابق مظاہرین نے املاک اور گاڑیوں کو آگ لگائی جبکہ کئی مظاہرین کو گرفتار کیا گیا ہے۔

امریکی شہر نیویارک میں پولیس نے احتجاج کرنے والے 200 سے زائد مظاہرین کو گرفتار کیا۔

امریکی صدارتی محل وائٹ ہاؤس کے باہر بھی احتجاجی مظاہرہ کیا گیا جس میں شہریوں کی بڑی تعداد نے شرکت کی، اس دوران پولیس اور مظاہرین میں تکرار بھی ہوئی۔ 

خیال رہے کہ گزشتہ دنوں ریاست منی سوٹا میں پر تشدد احتجاجی مظاہرے اُس وقت شروع ہوئے جب سوشل میڈیا پر ایک ویڈیو سامنے آئی جس میں سڑک پر جارج فلوئیڈ نامی ایک 46 سالہ سیاہ فام شخص کی گردن کو ایک پولیس اہلکار اپنے گھٹنے سے دبا رہا ہے جب کہ وہ شخص گُھٹتی ہوئی آواز میں کہ رہا ہے کہ 'مجھے سانس نہیں آرہی، مجھے قتل مت کرو'۔

رپورٹس کے مطابق واقعے کے کچھ دیر بعد اس شخص کو ایمبولینس میں اسپتال منتقل کیا گیا جہاں اس کی موت واقع ہوگئی تھی۔