دہشتگرد حملہ ناکام بنانے والے شہید سیکیورٹی گارڈ کی بہن بھی انتقال کرگئیں

کراچی میں پاکستان اسٹاک ایکسچینج پر دہشتگرد حملہ ناکام بنانے والے شہید سیکیورٹی گارڈ حسن کی بہن بھی انتقال کرگئیں۔

نجی  سکیورٹی کمپنی کے سپروائزر کے مطابق جس وقت اسٹاک ایکسچینج پر حملے میں حسن شہید ہوا، اسی وقت گھر پر اس کی بہن بھی انتقال کرگئی، شہید بھائی اور بہن کی نماز جنازہ ایک ساتھ ادا کی گئی۔

اسٹاک ایکسچینج پر حملہ کرنے والوں کو کیسے ڈھیر کیا گیا؟ فوٹیج سامنے آگئی

سیکیورٹی گارڈز کی فائرنگ سے ایک دہشت گرد کو گرتے دیکھاجاسکتا ہے جب کہ کچھ دیر بعد ایک اور دہشت گرد بھی سیکیورٹی گارڈز کی فائرنگ کا نشانہ بنا

خیال رہے کہ آج کراچی میں پاکستان اسٹاک ایکسچینج پر دہشتگردوں کا حملہ ناکام بنانے میں پولیس اور رینجرز کے علاوہ 2 نجی سیکیورٹی کمپنیز کے گارڈز نے بھی نمایاں کردار ادا کیا۔

اس دوران 3 سیکورٹی گارڈز شہید جبکہ دو شدید زخمی ہوئے۔ شہید گارڈز میں سے دو اسٹاک ایکسچینج جبکہ ایک قریبی بینک میں تعینات تھا۔

افتخار وحید دسمبر 2016 اور خدایار دسمبر 2014 سے اسٹاک ایکسچینج میں تعینات تھے۔ دونوں کا تعلق خیبرپختونخوا کے علاقے دیر سے تھا۔

سیکیورٹی کمپنی کے سی او او کرنل ریٹائرڈ محسن نے بتایا کہ افتخار وحید کو سر میں گولی لگنے کے بعد اسپتال لے جایا جارہا تھا کہ وہ راستے میں دم توڑ گئے جبکہ خدا یار کو 6 گولیاں لگیں جو موقع پر ہی شہید ہوگئے۔ کرنل محسن نے شہیدمحافظوں کیلئے انعام اور تمام اخراجات اُٹھانے کا اعلان کیا ہے۔