پی ایف یو جے کا فیصل واوڈا کیجانب سے صحافیوں کو دھمکیاں دینے پر اظہار تشویش

پاکستان فیڈرل یونین آف جرنلسٹ (پی ایف یو جے) نے وفاقی وزیر برائے آبی وسائل فیصل واوڈا کی جانب سے صحافیوں کو دھمکیاں دینے پر تشویش کا اظہار کیا ہے۔

پی ایف یو جے کے بیان کے مطابق فیصل واوڈا نے سوشل میڈیا پر سینیئر صحافیوں کے خلاف قابل اعتراض زبان استعمال کی۔

بیان میں کہا گیا ہے کہ فیصل واوڈا نے وسعت اللہ خان، ضرار کھوڑو، مبشرزیدی، فخردرانی اور عمر چیمہ سے بدزبانی کی اور سرکاری عہدیدار اور منتخب نمائندے کا اس طرح کی زبان استعمال کرنا حیران کن ہے۔

صحافتی تنظیم نے مطالبہ کیا کہ وفاقی وزیر فیصل واوڈا اپنے اس عمل پر معافی مانگیں اور وزیراعظم عمران خان اپنے وزیر کے رویے کی تحقیقات کریں۔

بیان میں کہا گیا ہے کہ فیصل واوڈا حکومت اور پی ٹی آئی دونوں کے لیے بوجھ بن چکے ہیں۔

خیال رہے کہ فیصل واوڈا نے غیرقانونی اثاثوں اور امریکی شہریت کے سوال پر سینیئر صحافیوں کو ٹوئٹر پر دھمکیاں دی ہیں۔