11 جولائی ، 2020 
چیک پوسٹ حملہ: کے پی حکومت کا پی ٹی ایم رہنماؤں کیخلاف کیس واپس لینے کا فیصلہ
11 جولائی ، 2020
خیبرپختونخوا حکومت نے پشتون تحفظ موومنٹ (پی ٹی ایم) کے رہنماؤں کے خلاف دائر کیس واپس لینے کا فیصلہ کرلیا۔
کے پی حکومت نے کیس واپس لینے کے لیے عدالت میں درخواست جمع کرا دی ہے جس میں کہا گیا ہے کہ صوبائی حکومت موجودہ صورتحال کے تناظر میں کیس واپس لینا چاہتی ہے۔
ذرائع نے بتایا کہ صوبائی حکومت نے فیصلہ قومی مفاد کے تحت کیا ہے۔
دوسری جانب پی ٹی ایم رہنماؤں کے وکیل عبدالطیف آفریدی ایڈوکیٹ نے جیونیوز سے گفتگو میں حکومت کی جانب سے درخواست دائر کرنے کی تصدیق کی اور کہا کہ حکومت نے کیس واپس لینے کے لیےعدالت میں درخواست دائرکی ہے۔
ان کا کہنا تھا کہ استغاثہ کی درخواست جمع ہونے کے بعد کیس خودبخود ختم ہوجاتا ہے۔
خیال رہے کہ خیبرپختونخوا کے ضلع شمالی وزیرستان میں خڑ کمر چیک پوسٹ پر حملے کا واقعہ 26 فروری 2019 کو پیش آیا تھا۔
خڑ کمر واقعے میں 13 افراد جاں بحق اور کئی زخمی ہوئے تھے جب کہ زخمیوں میں 5 سیکیورٹی اہلکار بھی شامل تھے۔ سی ٹی ڈی نے پی ٹی ایم رہنما محسن داوڑ اور علی وزیر سمیت دیگر کے خلاف مقدمہ درج کیا تھا۔
پی ٹی ایم رہنماؤں کے خلاف کیس بنوں کے انسداد دہشتگردی کی عدالت میں زیر سماعت ہے جہاں اب کیس کی سماعت 16 جولائی کو ہوگی۔
