21 ستمبر ، 2020 
ڈاکٹر ماہا مبینہ قتل کیس: ضمانت مسترد ہونے پر دونوں ملزمان عدالت سے فرار
21 ستمبر ، 2020
ڈاکٹر ماہا مبینہ قتل کیس میں سٹی کورٹ نے ملزم جنید اور وقاص کی درخواست ضمانت مسترد کردی جس کے بعد ملزمان اپنے وکیل کی معاونت سے باآسانی عدالتی احاطے سے فرار ہوگئے اور پولیس دیکھتی رہ گئی۔
ایڈیشنل ڈسٹرکٹ اینڈ سیشن جج جنوبی کی عدالت نے ڈاکٹر ماہا شاہ خودکشی میں ملزمان جنید اور وقاص کی درخواست ضمانت مسترد کردی جس کے بعد ملزمان احاطہ عدالت سے فرار ہوگئے۔
عدالت نے ملزمان کی عبوری ضمانت میں توثیق کی درخواست مسترد کردی جس کے بعد دونوں ملزمان احاط عدالت سے دوڑتے ہوئے باہر نکل گئے۔ ملزم جنید کے وکیل تفتیشی افسر کو مسلسل ملزم کی گرفتاری سے روکتے رہے جب کہ ملزم جنید ایک ہاتھ میں ہتھکڑی سمیت فرار ہوگیا۔
ملزم جنید نے تفتیشی افسر پر الزام بھی عائد کیا ہے کہ کیس میں فائدہ دینے کے لیے اس نے ایک لاکھ روپے رشوت وصول کی ہے۔
دونوں ملزمان کے خلاف مبینہ طور پر خودکشی کرنے والی ڈاکٹر ماہا شاہ کے والد آصف علی شاہ نے الزام عائد کیا ہے کہ ملزمان نے ان کی بیٹی کو نشے کا عادی کیا اس پر تشدد کرتے رہے ہیں۔
انہوں نے کہا کہ ملزمان آج عدالت سے فرار ہوگئے ہیں ملک سے بھی فرار ہوجائیں گے۔
ملزم جنید کے وکیل تفتیشی افسر کو مسلسل ملزم کی گرفتاری سے روکتے رہے جبکہ ملزم جنید ایک ہاتھ میں ہتھکڑی سمیت فرار ہوگیا۔
