آئی فون 12 اور 12 پرو میں زیادہ پائیدار کون ؟ ڈراپ ٹیسٹ کا نتیجہ جانیے

03 نومبر ، 2020

امریکی ٹیکنالوجی کمپنی ایپل کی جانب سے گزشتہ ماہ آئی فون 12 کے چار ماڈلز پیش کیے گئے تھے اور کمپنی نے دعویٰ کیا تھا کہ ان کے یہ نئے فون پہلے سے زیادہ پائیدار ہوں گے۔

کمپنی کے دعوے پر عملی طور پر تجربہ کرنے کے لیے امریکا کی ایک آل اسٹیٹ انشورنس کمپنی کی جانب سے آئی فون 12 کی پائیداری جانچنے کے لیے ’ڈراپ ٹیسٹ‘ کیا گیا ہے۔

ڈراپ ٹیسٹ کیا ہوتا ہے؟

ڈراپ ٹیسٹ کسی بھی فون کی پائیداری جانچنے کے لیے کیا جاتا ہے جس میں فون کو مختلف طرح سے پھینکا جاتا ہے جس سے اس کی پائیداری کا اندازہ لگایا جاتا ہے۔

ڈراپ ٹیسٹ میں کون سا ماڈل کامیاب رہا؟

آل اسٹیٹ کی جانب سے آئی فون 12 اور 12 پرو کے ڈراپ ٹیسٹ کیے گئے جس کی ویڈیو میں دیکھا جا سکتا ہے کہ دونوں فونز کو 6 فٹ کی اونچائی سے مختلف طریقوں سے پھینکا گیا۔

یہ بھی پڑھیں

دلچسپی کی بات یہ ہے کہ ڈراپ ٹیسٹ میں آئی فون 12 پر زیادہ کریک نہیں آئے جب کہ آئی فون 12 پرو کی شیلڈ اور کیمرا بری طرح سے ٹوٹ گیا تھا۔

ڈراپ ٹیسٹ کرنے والی کمپنی نے کہا کہ آئی فون 12، 12 پرو کے مقابلے میں زیادہ پائیدار ہے۔

خیال رہے کہ کمپنی نے آئی فون 12کے لانچ کے وقت دعویٰ کیا تھا کہ آئی فون 12 کے تمام تر ماڈلز کے فرنٹ کور ڈسپلے پر "سِرامک شیلڈ" ہے جس کی وجہ سے اس کا گلاس تمام تر اسمارٹ فونز کے گلاس سے مضبوط سمجھا جا رہا ہے اور کمپنی کے مطابق اگر یہ فون گرے گا تو اب اس کے ٹوٹنے کا امکان 4 گنا کم ہوگا۔