انڈونیشیا کے تباہ ہونیوالے مسافر طیارے سے متعلق نیا انکشاف سامنے آگیا

سمندر میں گرکر تباہ ہونے والے انڈونیشین طیارے سے متعلق انکشاف ہوا ہےکہ طیارے کو گزشتہ ماہ ہی انسپیکشن کے بعد کلیئر کیا گیا تھا۔

برطانوی میڈیا کےمطابق انڈونیشین ائیرلائن کمپنی سری وجائیا کی پرواز ایس جے 182 کو گزشتہ برس مارچ سے دسمبر کے درمیان گراؤنڈ کیا گیا تھا جس کی کمرشل پروازیں گزشتہ ماہ ہی 22 دسمبر سے بحال کی گئیں۔

میڈیا رپورٹس کے مطابق طیارہ حادثے میں اب تک جہاز کے تباہ ہونے کی کوئی وجہ معلوم نہیں ہوسکی ہے البتہ ابتدائی تحقیقات میں یہ بات سامنے آئی ہےکہ تباہ ہونے سے پہلے بھی جہاز مکمل طور پر فنکشنل تھا۔

پیر کے روز انڈونیشیا کی پولیس نے طیارہ حادثے میں ہلاک ہونے والی ایک خاتون کی شناخت کی جو اسی پرواز کی 29 سالہ فلائٹ اٹینڈنٹ ہے۔

انڈونیشیا کی وزارت ٹرانسپورٹ کا کہنا ہےکہ بوئنگ 737 کو کورونا وائرس کی وجہ سے گراؤنڈ کیا گیا تھا لیکن 14 دسمبر کو مکمل جانچ پڑتال کے بعد طیارے کو کلیئرنس دی گئی تھی جس کے بعد طیارے نے 5 روز بعد ہی بغیر مسافروں کے اپنی پہلی پرواز مکمل کی تھی اور پھر اسے کمرشل پروازوں کی اجازت دی گئی۔

علاوہ ازیں نیشنل ٹرانسپورٹیشن سیفٹی کمیٹی کے مطابق اب تک کی تحقیقات میں پتا چلا ہےکہ جہاز مقامی وقت کے مطابق 2 بجکر 36 منٹ پر 10900 فٹ کی بلندی تک گیا جس کے بعد انتہائی تیزی سے رخ بدلتے ہوئے 2 بجکر 40 منٹ پر ہی ٹرانسمیٹنگ ڈیٹا بند ہونے سے قبل 250 فٹ کی بلندی تک آگیا۔

کمیٹی کے مطابق جہاز کی ٹربائن ڈسک اور ٹوٹے ہوئے پنکھے کے پر بھی مل چکےہیں جس سے یہ بات ظاہر ہوتی ہے کہ جہاز فضا میں دھماکے سے تباہ نہیں ہوا جب کہ پنکھے کے پر اس بات کی نشاندہی کرتے ہیں کہ جب جہاز تباہ ہوا اس وقت بھی مکمل طور پر فنکشنل تھا جس سے اس بات کا یقین ہوتا ہےکہ 250 فٹ کی بلندی تک آنے کے باوجود جہاز کا سسٹم پوری طرح کام کررہا تھا۔

خیال رہے کہ چند روز قبل انڈونیشیا کی مقامی ائیرلائن کا بوئنگ 737 طیارہ ٹیک آف کے 4 منٹ بعد ہی ریڈار سے غائب ہوگیا تھا، طیارے میں عملے کے 6 ارکان سمیت 62 افراد سوار تھے۔

جہاز کے تباہ ہونے کی تصدیق ہوچکی ہے اور تحقیقاتی ٹیم نے اس کے بلیک باکس کا بھی پتا لگالیا ہے جو  جائے حادثہ سے 150 سے 200 میٹر دور سمندر کی تہہ میں موجود ہیں۔