کھیل

ویرات کوہلی دیگر فارمیٹس کی کپتانی بھی چھوڑدیں: شاہد آفریدی کا مشورہ

13 نومبر ، 2021

آئی پی ایل ٹیم دکن چارجرز میں روہت شرما کے ساتھ کھیلا ہے، وہ بہترین شاٹ سلیکشن رکھنے والے کھلاڑی ہیں/ آفریدی، فائل فوٹو

سابق کرکٹر شاہد آفریدی نے ویرات کوہلی کو دیگر دو فارمیٹس کی کپتانی بھی چھوڑنے کا مشورہ دے دیا۔

کرکٹ ویب سائٹ کے مطابق شاہد آفریدی نے نجی ٹی وی سے گفتگو کرتے ہوئے روہت شرما کو بھارتی ٹی ٹوئنٹی ٹیم کا کپتان مقرر کیے جانے کے فیصلے کو سراہا۔

شاہد آفریدی نے کہا کہ روہت شرما ایک شاندار کھلاڑی ہیں اور شاٹ سلیکشن ان کی خصوصیت ہے، وہ فیلڈ میں پرسکون اور جارحیت کا درست مکس اپ ہیں۔

زیادہ پڑھی جانے والی خبریں

سابق کرکٹر کا کہنا تھا کہ انہوں نے آئی پی ایل ٹیم دکن چارجرز میں روہت شرما کے ساتھ کھیلا ہے، وہ بہترین شاٹ سلیکشن رکھنے والے کھلاڑی ہیں، جہاں ضرورت ہوتی ہے وہ مطمئن رہتے ہیں اور جہاں جارحیت دکھانا ہوتی ہے وہ ایسا ہی کرتے ہیں، انہوں نے ان کے دونوں انداز دیکھے ہیں۔

شاہد آفریدی نے کہا کہ بھارتی ٹیم میں کپتانی کی تبدیلی کا عمل ہونا تھا لیکن روہت شرما کو لازمی چانس ملنا چاہیے۔

سابق کرکٹر نے اس موقع ویرات کوہلی کو مشورہ دیتے ہوئے کہا کہ کوہلی کو بطور کھلاڑی اپنے کیرئیر کو آگے بڑھانا چاہیے، انہیں بھارتی ٹیم کے دیگر دو فارمیٹس کی کپتانی سے بھی دستبرداری اختیار کرنی چاہیے۔

شاہد آفریدی کا کہنا تھا کہ کپتانی کوئی آسان ٹاسک نہیں اور خاص کر پاکستان، بھارت جیسے ممالک میں یہ بہت مشکل ہے، جب تک سب ٹھیک چل رہا ہو تو کپتانی اچھی رہتی ہے اس لیے ویرات کو صرف بطور کھلاڑی آگے چلنے کا فیصلہ کرنا چاہیے، اس سے ان پر پریشر میں کمی آئے گی اور وہ کرکٹ سمیت اپنی بیٹنگ کو انجوائے کریں گے۔