01 مارچ ، 2022 
کراچی میں پولیس کو پیٹرولنگ کیلئے نئی ہدایات جاری کردی گئیں
01 مارچ ، 2022
کراچی کے علاقے فیڈرل بی انڈسٹریل ایریا میں گزشتہ روز پولیس موبائل پر موٹر سائیکل سوار ملزمان کی فائرنگ کے واقعےکے بعدکراچی میں پولیس پیٹرولنگ کے لیے حکام کی جانب سے نئی ہدایات جاری کردی گئی ہیں۔
تحریری احکامات میں سکیورٹی کے لیے دی گئی ہدایات پر فوری طور اور سختی سے عمل درآمد کا بھی حکم دیا گیا ہے۔
ڈپٹی انسپکٹر جنرل پولیس ساؤتھ کے دفتر سے جاری ہدایات میں کہا گیا ہےکہ پیٹرولنگ اسٹاف دوران ڈیوٹی تمام وقت بلٹ پروف جیکٹس اور ہیلمٹ پہنے رکھےگا۔
ہدایات میں یہ بھی کہا گیا ہےکہ تمام پولیس موبائلوں پر کم از کم 4 اہلکاروں کی نفری ہر وقت موجود ہوگی، پولیس موبائل کے ڈرائیور کے پاس دوران ڈیوٹی تمام وقت فل میگزین لوڈِڈ پستول موجود ہوگا۔
ہدایات میں یہ بھی کہا گیا ہےکہ پولیس موبائل پر موجود اسٹاف میں سے ایک جوان کے پاس فل میگزین لوڈِڈ ایس ایم جی ہوگی، پولیس موبائل میں ایک جوان ہیلمٹ اور بلڈ پروف جیکٹ پہن کر ایس ایم جی کے ساتھ لازمی کھڑا ہوگا۔
ہدایات میں یہ بھی کہا گیا ہے کہ ایک موٹر سائیکل پر دو مسلح جوان، پولیس موبائل کے ساتھ مشترکہ طور پر گشت کریں گے تاکہ ایک دوسرے کو کور کر سکیں۔
