ایپل گھر سے کام کرنے کے بہتر ماڈل کی تلاش میں مصروف

09 جون ، 2022

ایک خطاب کے دوران ایپل کے سی ای او ٹم کک نے اس بارے میں بات کی / رائٹرز فوٹو

ٹیسلا کے سی ای او ایلون مسک نے گزشتہ دنوں کہا تھا کہ ملازمین کو گھر کی بجائے اب دفتر آکر کام کرنا ہوگا یا پھر ملازمت کو چھوڑنا ہوگا۔

اب اس حوالے سے ایپل کے سی ای او ٹم کک کا نکتہ نظر سامنے آیا ہے اور انہوں نے تسلیم کیا ہے کہ ملازمین کی دفاتر میں واپسی کے منصوبوں میں تبدیلی کی ضرورت ہے اور ریموٹ ورک دفتری امور کے تمام ماڈلز کی بنیاد ہے۔

انہوں نے کہا کہ کمپنی کی جانب سے متوازن ریموٹ ورک (گھر سے کام) کے طریقوں کی آزمائش کی جارہی ہے۔

یہ بھی پڑھیں

ٹائم 100 سمٹ کے موقع پر بات کرتے ہوئے ٹم کک نے کہا کہ ہم ہر طرح کے تجربات کررہے ہیں کیونکہ ہمیں اندازہ نہیں کہ کونسا طریقہ کار زیادہ بہتر ہوگا۔

انہوں نے مزید کہا کہ ہم ایسے طریقہ کار کو تلاش کررہے ہیں جو ریموٹ ورک اور دفاتر میں کام کرنے کا بہترین امتزاج ہو۔

ان کا کہنا تھا کہ اگرچہ وہ دفاتر میں لوگوں کی موجودگی میں میٹنگ کرنا پسند کرتے ہیں مگر ورچوئل میٹنگ بھی بری نہیں بلکہ کچھ مختلف ہے۔

واضح رہے کہ کچھ ماہ قبل ایپل کی جانب سے دیگر کچھ کمپنیوں کے مقابلے میں ملازمین کی دفاتر میں واپسی کے لیے سخت مؤقف اپنایا گیا تھا، جس کے بعد کمپنی کے سابق مشین لرننگ ڈائریکٹر آئن گڈ فیلو مستعفی ہوگئے تھے۔

ایپل کے سی ای او نے کہا کہ دفاتر آنے اور گھر میں کام کرنے کے فوائد پر مبنی ہائبرڈ ماڈل اس وقت استعمال ہونے والے ماڈل سے کافی مختلف ہوسکتا ہے۔

انہوں نے کہا کہ ہمارے خیال میں آغاز ٹھیک نہیں اور اس طریقہ کار میں تبدیلیوں کی ضرورت ہے۔