سکھر: جون میں ہونیوالی بارش نے 8 سالہ ریکارڈ توڑ دیا
20 جون ، 2022
ملک میں پری مون سون کا سلسلہ شروع ہوتے ہی مختلف علاقوں میں بادلوں کی گھن گرج جاری ہے۔
محکمہ موسمیات کی جانب سے جاری اعداد و شمار کے مطابق گزشتہ 24 گھنٹوں میں اب تک سب سے زیادہ بارش صوبے سندھ کے شہر سکھر میں 82 ملی میٹر ریکارڈ کی گئی۔
محکمہ موسمیات کا کہنا ہےکہ سکھر میں ہونے والی بارش نے 8 سالہ ریکارڈ توڑ دیا ہے کیونکہ اس سے قبل 16 جون 2013 میں سکھر میں 28 ملی میٹر بارش ریکارڈ کی گئی تھی۔
محکمہ موسمیات کےمطابق گزشتہ 24گھنٹوں کے دوران روہڑی میں 38 ملی میٹر اور جیکب آباد میں 14 ملی میٹر بارش ریکارڈ کی گئی۔
اس کے علاوہ پنجاب کے شہر ڈیرہ غازی خان میں 31، منگلا 17اور رحیم یار خان میں 16 ملی میٹر بارش ریکارڈ کی گئی۔
خیبر پختونخوا کے علاقے تخت بھائی میں 22 ملی میٹر، بالاکوٹ 6، بلوچستان کے علاقے بارکھان میں 19، سبی 6 ملی میٹر جب کہ آزاد کشمیر کے علاقے راولا کوٹ میں 15ملی میٹر بارش ریکارڈ کی گئی ہے۔
