بارش کے موسم میں نقصان سے بچنے کیلئے کیا احتیاط کریں؟

برسات کے موسم میں غفلت اور لاپرواہی  کی وجہ سے حادثات کا پیش آنا ایک معمول بن گیا ہے لیکن اگر ہم ذرا سی احتیاط سے کام لیں تو اس موسم  میں جانی نقصان سے بچا جاسکتا ہے۔

محکمہ موسمیات کی جانب سے 22 جون تک ملک بھر میں موسلا دھار بارشوں کی پیش گوئی کی گئی ہے جب کہ اس  دوران کراچی میں بھی تیز ہوائوں اور گرج چمک کے ساتھ بارشوں کا امکان ہے۔ 

ایسے میں شہریوں کو چند احتیاطی تدابیر اپنانے اور بنیادی انتظامات کرنا ضروری  ہیں جن سے حادثات سے بچا جاسکتا ہے۔

1-چھتری/رین کوٹ

بارشوں کے موسم میں چھتری اور رین کوٹ بنیادی ضروریات ہیں، اس لیے بارش میں باہر جانے سے پہلے چھتری یا رین کوٹ لازمی اپنے ساتھ رکھیں، اس سے نہ صرف آپ بارش سے محفوظ رہیں گے بلکہ آپ کا ذاتی سامان بھی بھیگنے سے بچ جائے گا جب کہ  بارش میں پلاسٹک بیگ بھی ساتھ رکھنا آپ کے کام آسکتا ہے۔

2-گھر کے دروازے اور کھڑکیاں بندرکھیں

بارشوں کے موسم میں گھروں میں پانی بھر جانا ایک بڑا مسئلہ ہے جس سے لوگوں کا کافی نقصان بھی ہوجاتا ہے۔ اس لیے بہتر ہے آپ بارشوں کے موسم میں گھر کی کھڑکیاں اور دروازے اچھے طریقے سے بند رکھیں تاکہ پانی گھر میں داخل نہ ہوسکےاور گھر کا فرنیچر خراب نہ ہو۔

3- بجلی کے پول اورتاروں سے دور رہیں

بارشوں کے دوران کرنٹ لگنے سے جانی نقصان کی خبریں بھی عام  ہوگئی ہیں جس میں زیادہ تر ہماری غفلت شامل ہوتی ہے لہٰذا ایسے  موسم میں بجلی کے پول اور خاص کر گری ہوئی تاروں سے فاصلہ رکھیں کیونکہ یہ آپ کے لیے جان لیوا ثابت ہوسکتے ہیں۔

4-کھڑے پانی سے گزرنے سے گریز کریں

بارش کے موسم میں پہلے تو بلاضرورت باہر نہ نکلیں اور  خاص کر جہاں پانی زیادہ کھڑا ہو وہاں کھلے گٹر بھی ہوسکتے ہیں جس سے جانی نقصان ہوسکتاہے اس لیے بہتر ہے کہ زیادہ ایمرجنسی کی صورت میں ہی باہر نکلا جائے۔

5-گاڑی کی رفتار کم رکھیں

مون سون سیزن میں تجربہ کار ڈرائیور کے لیے بھی ڈرائیونگ کرنا آسان نہیں کیونکہ اس موسم میں سڑکیں گیلی ہونے کی وجہ سے گاڑیوں کے پھسلنے کا خطرہ زیادہ ہوتا ہے۔ 

ڈرائیونگ کے دوران اچانک ٹرن اور بریک مارنے سے گریز کریں جب کہ آگے والی گاڑی سے فاصلہ رکھیں، بڑی گاڑیوں سے دور رہیں اور ہیڈلائٹ آن کردیں تاکہ آپ کی گاڑی دوسروں کو بھی نظر آئے۔

اس کے علاوہ بارشوں کے موسم میں اپنی گاڑی میں تیل اور دیگر چیزوں کا معائنہ کرکے باہر نکلیں۔

6-برقی آلات کے پلگ کو ساکٹ سے نکال دیں

بارش کے موسم میں بجلی کی حفاظتی تدابیر میں سے یہ بھی ایک لازمی ہے کہ آپ اپنے گھر میں موجود تمام برقی آلات کو ان پلگ کردیں کیونکہ اس موسم میں وولٹیج کے کبھی کم تو کبھی زیادہ ہونے سے شارٹ سرکٹ کا خدشہ ہوتا ہے۔