20 جولائی ، 2022 
وزیر اعلیٰ پنجاب کا انتخاب: پی ٹی آئی نے اپنے ارکان اسمبلی کو ہدایت نامہ جاری کردیا
20 جولائی ، 2022
پاکستان تحریک انصاف کے چیئر مین عمران خان کی ہدایت پر پی ٹی آئی کے ارکان پنجاب اسمبلی کو 22 جولائی کو ہونے والے وزیراعلیٰ کے انتخاب کیلئے تحریری ہدایت نامہ جاری کردیا گیا۔
ذرائع کے مطابق ہدایت نامے میں کہا گیا ہے کہ پاکستان تحریک انصاف کے تمام ارکان پنجاب اسمبلی 22 جولائی کو اسمبلی میں حاضر ہوں اور پرویز الہٰی کو وزارتِ اعلیٰ کا ووٹ دیں۔
ہدایت نامے کے مطابق کوئی رکن اسمبلی میں نہ آئے یا ووٹ نہ ڈالا تو اس کے خلاف نا اہلی کی کارروائی کی جائے گی۔
دوسری جانب بیرونِ ملک جانے والے ارکان پنجاب اسمبلی کی وطن واپسی شروع ہوگئی ہے۔
خیال رہے کہ سپریم کورٹ آف پاکستان کے حکم پر 22 جولائی کو وزیراعلیٰ پنجاب کا انتخاب ہوگا اور پی ٹی آئی کی جانب سے پرویز الٰہی اور ن لیگ کے حمزہ شہباز وزارت اعلیٰ کے امیدوار ہیں۔
