28 جولائی ، 2022 
بھارت نے دریائے چناب میں پانی چھوڑ دیا، سیلاب کا خطرہ
28 جولائی ، 2022
بھارت نے دریائے چناب میں پانی چھوڑ دیا ہے جس سے اگلے 24 سے 48 گھنٹوں میں سیلاب کا خطرہ پیدا ہو گیا ہے۔
پراونشل ڈزاسٹر منیجمنٹ اتھارٹی (پی ڈی ایم اے) نے خبردار کیا ہے کہ بھارت کی جانب سے دریائے چناب میں پانی چھوڑے جانے کے بعد خانکی اور قادرآباد کے مقام پراگلے 24 سے 48 گھنٹوں میں سیلاب کاخطرہ ہے۔
پی ڈی ایم اے کے مطابق کل تک دریائے چناب میں پانی کا بہاؤ 2 لاکھ 75 ہزارکیوسک تک پہنچ جائے گا۔
پی ڈی ایم اے نے خبردار کیا ہے کہ دریائے چناب میں سیلابی صورتحال سے سیالکوٹ، گجرات، گوجرانوالہ، حافظ آباد، چنیوٹ، جھنگ اور مظفرگڑھ کے علاقے متاثر ہونے کا امکان ہے۔
پی ڈی ایم اے کی جانب سے متعلقہ حکام کو خبردار کیا گیا ہے کہ عملے کی چھٹیاں منسوخ کرتے ہوئے ممکنہ ہنگامی حالات سے نمٹنے کی تیاریاں کی جائیں۔
