26 اگست ، 2022 
طوفانی بارش کے باعث کوئٹہ میں سیلاب کا خدشہ، عوام کو بائی پاس پر جمع ہونے کی ہدایت
26 اگست ، 2022
مشیر داخلہ بلوچستان میر ضیا لانگو نے خواتین اور بچوں سمیت سینکڑوں افراد کے سیلاب زدہ علاقوں میں پھنسنے کی تصدیق کرتے ہوئے وفاقی حکومت سے ہر ممکن تعاون کا مطالبہ کیا ہے۔
مشیر داخلہ بلوچستان میر ضیا لانگو اور ڈی جی پی ڈی ایم اے نے بارش سے متاثرہ علاقوں کا دورہ کرتے ہوئے تصدیق کی کہ کوئٹہ کے نواحی علاقوں میں خواتین اور بچوں سمیت 500 سے زائد افراد سیلابی پانی میں پھنسے ہیں۔
ضیا لانگو کا کہنا تھا کہ پی ڈی ایم اے، پولیس اور انتظامیہ کا متاثرہ علاقوں میں ریسکیو آپریشن جاری ہے، سیلاب زدہ علاقوں میں پھنسے 100 لوگوں کو نکال لیا گیا ہے جبکہ مزید 150 افراد پانی میں پھنسے ہوئے ہیں جنہیں نکالنے کے لیے امدادی کارروائیاں جاری ہیں۔
مشیر داخلہ بلوچستان نے صوبے کی مددکے لیے وفاقی حکومت سے تعاون کی اپیل کرتے ہوئے کہا کہ اس وقت کوئٹہ میں شدید بارش کے باعث سیلابی صورتحال کا سامنا ہے۔
ان کا یہ بھی کہنا تھا کہ طوفانی بارشوں اور سیلابی صورتحال کے باعث صوبہ شدید مشکل سے دوچار ہے، وفاقی حکومت، مخیر حضرات اور بین الاقوامی ادارے سیلاب زدگان کی ہر ممکن مدد کریں۔
ڈپٹی کمشنر کوئٹہ کا کہنا ہے کہ مسلسل تیز بارش کی وجہ سے شدید سیلاب کا خدشہ ہے، کلی ناصران کے مکین اپنے مکانوں سے بائی پاس کی طرف نکل آئیں۔
ادھر ضلع بولان میں انگریز دور کا 130 سال پرانا ریلوے پل ٹوٹ گیا جس کے باعث کوئٹہ کا ریل کے ذریعے اندرون ملک سے رابطہ ایک ماہ تک ناممکن ہو گیا ہے۔
