ایپل 11 سال بعد آئی فونز میں بہت بڑی تبدیلی کے لیے تیار

07 اکتوبر ، 2022

ایپل کے آئی فون 14 سیریز کو متعارف ہوئے زیادہ عرصہ نہیں ہوا مگر اس کمپنی کی آئندہ سال کی ڈیوائسز کے بارے میں لیکس ابھی سے سامنے آنا شروع ہوگئی ہیں۔

نئی لیکس میں بتایا گیا ہے کہ آئی فون 15 سیریز یو ایس بی ٹائپ سی چارجنگ پورٹ سے لیس ہوگی۔

درحقیقت یہ 11 سال (2023 میں) بعد پہلی بار ہوگا جب ایپل کی جانب سے آئی فونز میں ایسی تبدیلی کی جائے گی۔

یہ بھی پڑھیں

اس سے قبل 2012 میں کمپنی نے 30 پن ڈوک کنکٹر کی جگہ لائٹننگ پورٹ کو دی تھی۔

مگر اب یورپی یونین کی جانب سے 2024 سے تمام الیکٹرونک ڈیوائسز کے لیے یو ایس بی ٹائپ سی پورٹ کے استعمال کو لازمی قرار دینے کے قانون کی منظوری کے باعث ایپل کو اپنے آئی فونز فروخت کرنے کے لیے چارجنگ پورٹ کو بدلنا ہوگا۔

لیک کے مطابق یورپ سمیت پوری دنیا میں آئی فون 15 سیریز کے فونز میں یو ایس بی ٹائپ سی چارجنگ پورٹ کو دیا جائے گا اور لائٹننگ پورٹ کو ختم کردیا جائے گا۔

اس سے قبل بھی رپورٹس میں کہا گیا تھا کہ ایپل کی جانب سے آئی فونز میں یو ایس بی ٹائپ سی چارجنگ پورٹ کی آزمائش کی جارہی ہے۔

یو ایس بی ٹائپ سی پورٹ سے ہٹ کر آئی فون 15 سیریز کے تمام فونز میں ڈائنامک آئی لینڈ کا فیچر دیے جانے کا امکان ہے، جو اس سال آئی فون 14 پرو ماڈلز تک محدود رکھا گیا۔

ایک اور رپورٹ میں دعویٰ کیا گیا کہ 2023 میں ایپل کی جانب سے پرو میکس ماڈل کو الٹرا سے بدل دیا جائے گا، جیسا اس سال ایپل واچ میں کیا گیا۔

یہ الٹرا ماڈل آئی فون 15 سیریز کے دیگر فونز سے بالکل مختلف ہوگا۔