13 اکتوبر ، 2022 
پاکستان جونیئر لیگ نے ایک اور ’حسن علی‘ ڈھونڈ نکالا
13 اکتوبر ، 2022
پاکستان جونیئر لیگ کا میلہ قذافی اسٹیڈیم لاہور میں سجا ہوا ہے جہاں 6 ٹیموں کے اس ایونٹ میں کئی با صلاحیت نوجوان کھلاڑی سامنے آ رہے ہیں۔
اس لیگ میں حسن علی بھی ایکشن میں ہیں جو اسپنر ہیں اور ان کا وکٹ لے کر جشن منانے کا انداز بالکل فاسٹ بولر حسن علی کی طرح ہے جس وجہ سے انہوں نے سب کو متاثر کیا ہے۔
حسن علی جونیئر کا تعلق فیصل آباد سے ہے اور وہ نمائندگی گوجرانوالا جائنٹس کی کررہے ہیں۔
جیو نیوز سے گفتگو کرتے ہوئے حسن علی جونیئر نے کہا کہ فاسٹ بولر حسن علی کا تعلق گوجرانوالا سے ہے اور میں گوجرانوالا ٹیم میں شامل ہوں تو جب مجھے حسن علی جونیئر لکھا جانے لگا تو پھر میں نے گوجرانوالا ٹیم میں حسن علی کا اسٹائل لانے کی کوشش کی۔
انہوں نے کہا کہ میں شروع ہی سے اسپن بولنگ کر رہا ہوں، میرے فیورٹ بولر آسٹریلیا کے نیتھن لوئن ہیں کیونکہ وہ بڑے اچھے انداز سے آف بریک کرتے ہیں۔
گوجرانوالا جائنٹس کے مینٹور شعیب ملک ہیں جن کےحوالے سے بات کرتے ہوئے حسن علی جونیئر نے کہا کہ شعیب ملک نیٹ پر میرے ساتھ بولنگ کرتے ہیں اور مجھے بہت کچھ بتاتے ہیں اور اعتماد دیتے ہیں جس کا مجھے بہت فائدہ ہوتا ہے۔
دوسری جانب فاسٹ بولر حسن علی نے سوشل میڈیا پر اپنے پیغام میں کہا کہ’ میں اپنے شہر کی ٹیم اور ایک کھلاڑی کو اپنا اسٹائل کاپی کرتے ہوئے دیکھ کر جذباتی ہوں، نیک خواہشات نوجوانوں کے ساتھ ہیں کہ وہ آنے والی کرکٹ جنریشنز کو متاثر کریں‘۔
