ٹوئٹر کے ویریفائیڈ اکاؤنٹ والے صارفین کو اب ماہانہ 8 ڈالر فیس ادا کرنا ہوگی

سماجی رابطے کی ویب سائٹ ٹوئٹر کے ویری فائیڈ یعنی بلیو ٹک رکھنے والے صارفین کو اب اس مد میں 8 ڈالر یعنی (17 سو سے زائد پاکستانی روپے) ماہانہ فیس ادا کرنا ہوگی۔

دنیا کے امیر ترین شخص ایلون مسک کی جانب سے ٹوئٹر کا انتظام سنبھالنے کے بعد متعدد تبدیلیاں کی گئی ہیں جیسے ٹوئٹر کے بورڈ آف ڈائریکٹرز کو کمپنی سے باہر نکال دیا ہے جبکہ مختلف رپورٹس کے مطابق ملازمین کی چھانٹی پر بھی غور کیا جارہا ہے۔

مگر اس کے ساتھ ساتھ وہ ٹوئٹر کے ویری فائیڈ صارفین کے حوالے سے پالیسی میں تبدیلی لانے پر کام کررہے تھے تاہم اب ایلون مسک نے اعلان کیا ہے کہ  ٹوئٹر کے ویری فائیڈ اکاؤنٹ والے صارفین کو 8 ڈالر  ماہانہ فیس ادا کرنا ہوگی۔

ایلون مسک نے اپنی ٹوئٹ میں کہا ہے کہ بلو ٹک کا نشان ہونےکا موجودہ نظام فضول ہے، نیا منصوبہ ٹوئٹرکو مواد تخلیق کرنے والوں کو دینے کے لیے آمدنی کا سلسلہ  بنے گا۔

اس کے علاوہ ان کا کہنا تھا کہ 8 ڈالر کی اس قیمت کو کسی ملک کی قوت خرید کے تناسب سے ایڈجسٹ کیا جائے گا، رقم ادا کرنے والوں کو  پوسٹ کاجواب دینے اور ٹوئٹر سرچز میں ترجیح ملے گی جس کا مقصد جعلسازی کو روکنا ہے۔

ٹوئٹر اکاؤنٹ کے نام کے آگے بلو ٹک عام طور پر مشہور شخصیات کے لیے فی الحال مفت تھا۔تاہم اب اس کی مد میں ماہانہ فیس ادا کرنے پر ناقدین کا کہنا ہے کہ اس اقدام سے قابل اعتماد ذرائع کی شناخت کرنا مشکل ہو سکتی ہے۔

اس سے قبل 31 اکتوبر کو رپورٹس سامنے آئی تھیں کہ ٹوئٹر کے صارفین کو بلیو ٹک برقرار رکھنے کے لیے 20 ڈالرز ماہانہ ادا کرنا پڑسکتے ہیں۔

ایلون مسک کا کہنا تھا کہ وہ اس منصوبے پر عملدرآمد سے قبل مکمل وضاحت کریں گے، اس سے ہی ہم بوٹس اور ٹرولز کو شکست دے سکتے ہیں۔

خیال رہے کہ ایلون مسک اس وقت ٹوئٹر کے سی ای او اور چیئرمین ہیں اور ان کے مطابق وہ عارضی طور پر کمپنی کے واحد ڈائریکٹر بھی ہیں۔

ایلون مسک ٹوئٹر کے بلیو ٹک پر کتنے روپے ماہانہ لینے کا ارادہ رکھتے ہیں؟

بلیو ٹک کی کتنی فیس ہوگی ابھی تو کچھ کہنا مشکل ہے مگر ایلون مسک نے ضرور ماہانہ فیس کی رقم کا عندیہ ایک ٹوئٹ میں دیا۔

ٹوئٹر کے ویری فائیڈ اکاؤنٹ والے صارفین اب فیس ادا کریں گے: رپورٹ

صارفین کو ٹوئٹر بلیو کو سبسکرائب کرنا ہوگا جس کے لیے 20 ڈالر ماہانہ ادا کرنا ہوں گے: رپورٹ