13 دسمبر ، 2022 
شاہد آفریدی کا انگلینڈکیخلاف تیسرے ٹیسٹ میں سرفراز اور شان مسعودکوکھلانےکا مشورہ
13 دسمبر ، 2022
پاکستان کرکٹ ٹیم کے سابق کپتان شاہد آفریدی نے بھی انگلینڈ کے خلاف تیسرے ٹیسٹ میں سرفراز احمد اور شان مسعود کو کھلانےکا مشورہ دے دیا۔
کراچی میں تقریب سے خطاب کرتے ہوئے سابق کپتان شاہد آفریدی کا کہنا تھا کہ انگلینڈ کی ٹیم آؤٹ اسٹینڈنگ کرکٹ کھیل رہی ہے، ان کے کوچ کی اپروچ بہت جارحانہ ہے، انگلینڈ اور پاکستان میں فنشنگ کا فرق ہے۔
شاہد آفریدی کا کہنا تھا کہ پاکستان کی پچز کا مسئلہ نہیں فرق صرف بنانے کے طریقہ کار کا ہے، انہیں وکٹوں پر ڈومیسٹک میچز کے بھی رزلٹ آتے ہیں، انگلینڈ ٹیم ٹیسٹ کرکٹ ایک مائنڈ سیٹ کے ساتھ کھیل رہی ہے، انگلینڈ کا کپتان بھی تگڑا ہے، فیصلے زبردست لیتا ہے۔
سابق کپتان شاہد آفریدی کا کہنا تھا کہ سرفراز احمد اور شان مسعود کو تیسرے ٹیسٹ میں موقع دینا چاہیے، ٹیسٹ چیمپئن شپ کے فائنل سے پاکستان آؤٹ ہو چکا ہے، ڈومیسٹک کرکٹ کے بہترین کھلاڑیوں کو اب موقع ملنا چاہیے۔
خیال رہےکہ اس سے قبل انگلینڈ کے ہاتھوں تین ٹیسٹ میچز کی سیریز کے ابتدائی دو میچز میں شکست کے بعد پاکستان کرکٹ ٹیم کے سابق کپتان شعیب ملک بھی تیسرے میچ کے لیے سرفراز احمد اور شان مسعود کو پلیئنگ الیون میں شامل کرنےکا مشورہ دے چکے ہیں۔
