14 دسمبر ، 2022 
بابر کو چاہیے ٹیسٹ میں رضوان کو آرام دے کر سرفراز کو کھلائے: محمد حفیظ
14 دسمبر ، 2022
پاکستان کے سابق کپتان محمد حفیظ نے بابر اعظم کو تجویز پیش کی ہے کہ انہیں ٹیسٹ میں محمد رضوان کو آرام دے کر سرفراز احمد کو موقع دینا چاہیے۔
جیو کے پروگرام اسکور میں گفتگوکرتے ہوئے محمد حفیظ نے ٹیسٹ سیریز میں انگلینڈ کی تکنیک کی تعریف کی اور کہا وہ شاندار پلاننگ کے ساتھ میدان میں اترے اور کامیاب بھی رہے۔
محمد حفیظ نے کہا کہ 'گزشتہ تین ساڑھے تین سالوں سے محمد رضوان پاکستان کرکٹ ٹیم کی ریڑھ کی ہڈی کے طور پر ٹیم میں شامل ہیں، وہ اچھی کارکردگی کا مظاہرہ کررہے ہیں لیکن ہم یہ ہی غلطی کر رہے ہیں، انہیں مسلسل کھلا رہے ہیں ہمیں چاہیے مسلسل کھیلنے والے کھلاڑیوں کو آرام دیں اور دوسرے آپشنز پر غور کریں'۔
انہوں نے کہا کہ 'اس سے قبل بھی کامران اکمل کے کیس میں یہی غلطی ہوئی، انہیں تینوں فارمیٹ پر بغیر آرام کے کھلایا گیا جس نے انہیں نقصان پہنچایا'۔
حفیظ کا کہنا تھا کہ 'سرفراز گزشتہ تین سال سے ٹیم کے ساتھ ہیں لیکن انہیں کھلایا نہیں جاتا، انہیں کئی جگہوں پر کھلایا جاسکتا ہے، اب بھی یہ لگ رہا ہے کہ پی سی بی یا بابر کو سوچنا چاہیے اگر رضوان کی ٹیسٹ کرکٹ میں کارکردگی اچھی نہیں ہو رہی تو انہیں بریک دے کر سرفراز یا کسی اور آپشن پر غور کریں'۔
سابق کپتان نے مزید کہا کہ 'پاکستان کو سعود شکیل اور ابرار احمد کے طور پر شاندار کھلاڑی ملے، ورلڈ کپ سے قبل جب انگلینڈ نے وائٹ بال سیریز کے لیے پاکستان کا دورہ کیا تھا جب ابرار کو کھلانا چاہیے تھا تاکہ اسے ٹی ٹوئنٹی فارمیٹ پر اپنا کھیل پیش کرنے کا موقع ملتا'۔
مزید خبریں :
اظہر علی کو پی سی بی میں اہم عہدہ مل گیا
22 نومبر ، 2024
