21 دسمبر ، 2022 
گورنر پنجاب نے اسپیکرکی گزشتہ روز کی رولنگ کو غیر آئینی قرار دے دیا
21 دسمبر ، 2022
گورنر پنجاب بلیغ الرحمان نے اسپیکر پنجاب اسمبلی سبطین خان کی گزشتہ روز کی رولنگ کو غیر آئینی قرار دے دیا۔
گورنر نے آئین کے آرٹیکل 130 کی شق 7 کے تحت حکم نامہ جاری کیا جس میں کہا ہے کہ آئین کا دفاع اور قانون کی پاسداری اسپیکر کی ذمہ داری ہے۔
گورنرپنجاب کا کہنا تھاکہ اسپیکر آئینی ذمہ داری کی ادائیگی میں ذاتی پسند کو ملحوظ خاطرنہ رکھیں، اسپیکر ایمانداری اور غیرجانبداری سے اپنی ذمہ داریاں ادا کرنے کے پابند ہیں۔
ان کا مزید کہنا تھاکہ اسپیکر نے آئین کے تحت حلف اٹھایا ہے، اس سے انحراف نہیں کرسکتے، اسپیکر نے رولنگ میں غیرقانونی نکات اٹھائے ہیں اور ہائیکورٹ کیس اور منظور وٹو کیس کی غلط مثال دی ہے۔
خیال رہے کہ گزشتہ گورنر پنجاب نے وزیراعلیٰ پنجاب پرویز الٰہی کو آج کے روز اسمبلی سے اعتماد کا ووٹ لینے کا کہا تھا تاہم اسپیکر نے گورنر کی ہدایت کو غیر آئینی قرار دینے کی رولنگ جاری کرتے ہوئے آج اجلاس طلب نہیں کیا۔
