09 مارچ ، 2023 
لاہور: دفعہ 144 کی خلاف ورزی پر گرفتار پی ٹی آئی کارکنوں کی فہرست جاری
09 مارچ ، 2023
لاہور پولیس نے زمان پارک کے باہر کینال روڈ پر دفعہ 144 کی خلاف ورزی اور توڑ پھوڑ کے الزام میں گرفتار پاکستان تحریک انصاف کے کارکنوں کی فہرست جاری کردی۔
پولیس کی جانب سے تحریک انصاف کے گرفتار کیے گئےکارکنوں کی فہرست کے مطابق زمان پارک کے باہر کینال روڈ پر دفعہ 144 کی خلاف ورزی، ہنگامہ آرائی اور توڑ پھوڑ کے الزام میں مجموعی طور پر 37 کارکنوں کو گرفتار کیا گیا۔
پولیس کے مطابق21 کارکنوں کو کینٹ ڈویژن پولیس نے جبکہ 16 کارکنوں کو سٹی ڈویژن پولیس نے گرفتار کیا ہے۔
واضح رہے کہ گزشتہ روز زمان پارک لاہور میں پولیس اور پاکستان تحریک انصاف (پی ٹی آئی) کے کارکن آمنے سامنے آگئے۔
پی ٹی آئی کی ریلی روکنے کیلئے پولیس نے پکڑ دھکڑ، شیلنگ اور آبی توپ کا استعمال بھی کیا۔
پولیس اور کارکنوں کی مڈ بھیڑ میں کئی گاڑیوں کے شیشے بھی ٹوٹ گئے۔ کارکنوں کی جانب سے پولیس پر پتھراؤ کیا گیا ۔ پولیس نے کئی کارکنوں کو حراست میں لیا۔
خیال رہے کہ پی ٹی آئی نےکل لاہور میں ریلی نکالنے کا اعلان کیا تھا اور عمران خان نے بھی اس ریلی میں شرکت کرنی تھی تاہم محکمہ داخلہ پنجاب نے لاہور میں جلسہ ، جلوس ، ریلی پر پابندی عائد کردی جس کے تحت احتجاج ، دھرنے اور مظاہروں پر بھی پابندی عائد ہوگئی ہے، یہ پابندی سات روز تک جاری رہے گی۔
