17 اپریل ، 2023 
شاہ لطیف تھانے کے پڑوس میں ڈاکوؤں نے ٹیلر، سیلون اور برگر والے سمیت 5 دکانیں لوٹ لیں
17 اپریل ، 2023
کراچی کے ضلع ملیر کے شاہ لطیف ٹاؤن تھانے کے پڑوس میں مسلح ملزمان نے ٹیلرنگ شاپ، سیلون اور برگر والے سمیت 5 دکانیں لوٹ لیں۔
علاقہ مکینوں کے مطابق شاہ لطیف ٹاؤن کی حدود میں چوری و ڈکیتی کی وارداتیں بلا روک ٹوک تواتر کے ساتھ ہو رہی ہیں۔
تازہ کارروائی میں مسلح ملزمان نے شاہ لطیف ٹاؤن تھانے کے قریب سیکٹر 17/B میں پانچ دکانوں کو ایک ساتھ لوٹ لیا، یہ واردات گزشتہ رات ایک بج کر 20 منٹ پرہوئی،مسلح ڈکیتوں نے یکے بعد دیگرے پانچ دکانوں کا صفایا کیا۔
مکینوں کے مطابق شاہ لطیف ٹاؤن تھانے کے قریب ہوئی واردات کے بعد پولیس ایک گھنٹے کے بعد پہنچی۔
ٹیلر راشد حسین کا کہنا ہے کہ ان کے پاس 5 سے 6 کاریگر کام کرتے ہیں، دکان سے 80 ہزار روپے نقدی اور موبائل فون ڈکیتوں نے لوٹ لیے۔
برگر والے کی ایک دن کی پوری کمائی اور میری جیب میں موجود 8 ہزار روپے ڈکیتوں نے اسلحے کے زور پر چھین لیے۔
احمد رضا کے سیلون سے ایک دن کی پوری سیل، موبائل فون اور دکان پر آئے تین گاہکوں کو بھی ڈکیتوں نے لوٹ لیا۔
ملزمان نے پڑوس کی دیگر دو دکانوں سے بھی لوٹ مار کی۔
