صحت و سائنس

تربوز کھانا پسند کرتے ہیں؟ تو اس کا بہترین فائدہ جان لیں

ویب ڈیسک

15 مئی ، 2023

ایک طبی تحقیق میں یہ بات سامنے آئی / فائل فوٹو

کیا آپ تربوز کھانا پسند کرتے ہیں؟ اگر ہاں تو یہ عادت صحت کے لیے بہت زیادہ مفید ثابت ہو سکتی ہے۔

یہ بات ایک طبی تحقیق میں سامنے آئی۔

جرنل نیوٹریشنز میں شائع تحقیق میں بتایا گیا کہ تربوز کھانے سے صحت کو ہونے والا فائدہ توقعات سے کہیں زیادہ ہوتا ہے۔

تحقیق کے مطابق تربوز کھانے سے جسم کے لیے اہم غذائی اجزا کے حصول میں مدد ملتی ہے جبکہ خوراک کا معیار بھی بہتر ہوتا ہے۔

اس تحقیق میں 2003 سے 2018 کے درمیان سروے رپورٹس سے جمع ہونے والے ڈیٹا کی جانچ پڑتال کی گئی تھی۔

تحقیق میں دریافت کیا گیا کہ جو افراد تربوز کھانے کے عادی ہوتے ہیں، ان کے جسم کو غذائی فائبر، میگنیشم، پوٹاشیم، وٹامن سی اور وٹامن اے سمیت لائیکو پین جیسے اجزا وافر مقدار میں ملتے ہیں۔

یہ سب اجزا جسمانی صحت کے لیے بہت اہم ہوتے ہیں۔

ماہرین نے بتایا کہ لائیکوپین سے امراض قلب یا دل کی بیماریوں سے قبل از وقت موت کا خطرہ کم ہوتا ہے۔

اسی طرح تربوز میں پانی کی مقدار بہت زیادہ ہوتی ہے جبکہ چکنائی نہیں ہوتی جس سے بلڈ پریشر، انسولین کی مزاحمت اور مسلز کی سوجن میں کمی آتی ہے۔

ماضی کی تحقیقی رپورٹس میں بتایا گیا تھا کہ تربوز کھانے سے ہاضمہ کے افعال بہتر ہوتے ہیں جبکہ جسمانی ورم میں کمی آتی ہے۔

اس نئی تحقیق میں بتایا گیا کہ جو افراد تربوز کھانا پسند کرتے ہیں وہ چینی اور صحت کے لیے نقصان دہ چکنائی کا استعمال بھی کم کرتے ہیں، جس سے بھی دل کی صحت پر مثبت اثرات مرتب ہوتے ہیں۔