آئی پی ایل میں افغان کرکٹر نوین الحق کے جشن کا طریقہ سنیل گواسکر کو پسند نہ آیا

انڈین پریمیر لیگ (آئی پی ایل) کی ٹیم لکھنؤ سپر جائنٹ کے بولر نوین الحق کا وکٹ لینے کے بعد جشن منانے کا انداز  سابق بھارتی کپتان سنیل گواسکر کو پسند نہ آیا، کمنٹری کے دوران اپنی ناپسندیدگی ظاہرکردی۔

بھارتی کرکٹ لیگ میں ممبئی انڈینز کے خلاف وکٹ لینے کے بعد جشن مناتے ہوئے نوین الحق نے اپنے کانوں میں انگلیاں ڈال کر جشن منایا جس سے تاثر لیا گیا کہ وہ حالیہ دنوں سوشل میڈیا پر خود پر ہونے والی تنقید کے ردعمل میں اس طرح کا جشن کا انداز اپنا رہے ہیں۔

گراؤنڈ میں جھگڑا، نوین الحق کا نام لیے بغیر کوہلی کو انسٹا اسٹوری کے ذریعے جواب

نوین الحق نے بغیر کسی کا نام لیے ذو معنی اسٹوری شیئر کی ہے جو سوشل میڈیا پر زیر گردش اور موضوع بحث بنی ہوئی ہے۔

ممبئی انڈینز کے خلاف  وکٹیں لینے پر جب نوین الحق نے کانوں میں انگلیاں ڈال کر جشن منایا تو سابق بھارتی کپتان سنیل گواسکر نے کمنٹری کے دوران ان کے انداز پر ناپسندیدگی کا اظہار کرتے ہوئے کہا کہ کیا انہیں شائقین سے کوئی مسئلہ ہے؟ انہیں تو کان کھول کر جشن کا مزہ لینا چاہیے۔

 گواسکر نے نوین الحق کو مشورہ دیا کہ جشن کے وقت کانوں کو بند کرنے کے بجائے انہیں اپنے کان کھول کر لوگوں کی حوصلہ افزائی اور شور کا مزہ لینا چاہیے،  اپنے ہاتھ کانوں کے پیچھے لگا کر کہنا چاہیے ’ہیلو، اب میں آپ کو سن سکتا ہوں‘، جشن تو اس طرح ہونا چاہیے۔