اسپین: تارکین وطن کی ڈوبنے والی کشتی سے سیکڑوں مسافروں کو بچالیا گیا

اسپین کے کینری جزیرے میں تارکین وطن کی ڈوبنے والی کشتی میں سوار سیکڑوں مسافروں کو ریسکیو کرلیا گیا۔

برطانوی خبررساں ادارے ( بی بی سی ) کی رپورٹ کے مطابق کشتی حادثے میں 30 افراد کی ہلاکت کا خدشہ رپورٹ ہونے کے بعد حکام نے گزشتہ روز کینری جزیرے سے 227  تارکین وطن کو ریسکیو کرلیا۔

کوسٹ گارڈ حکام کا بتانا ہےکہ تارکین وطن  جزیرہ لینزاروٹ اور گرین کینیریا جزیرے پر  کشتیوں میں سفر کر رہے تھے۔

تارکین وطن کی کشتی ڈوبنے کا ایک اور واقعہ، ہلاکتوں کا خدشہ

اسپین اور مراکش کے سرکاری حکام کی جانب سے حادثے میں ڈوبنے اور لاپتا افراد کی تعداد کے حوالے سے کوئی اعداد وشمار جاری نہیں کیے گئے۔

ایمرجنسی سروس کے مطابق ریسکیو کیے گئے افراد میں سے متعدد کو اسپتال منتقل کیا گیا ہے جہاں ان کی حالت بہتر بتائی جاتی ہے۔

واضح رہے کہ گزشتہ روز  تارکین وطن پر نظر رکھنے والی دو تنظیموں الارم فون اور واکنگ بارڈ نے اسپین کے کینری جزیرے پر تارکین وطن کی ایک اور کشتی ڈوبنے کا واقعہ پیش آنے کی اطلاع دی تھی جس  میں 30 سے زائد تارکین وطن کی ہلاکت کا خدشہ ظاہر کیا گیا تھا۔

واکنگ بارڈر کے ترجمان ہیلینا میلینو نے ٹوئٹر پر جاری بیان میں بتایا کہ اسپین کے قریب کشتی حادثے میں 39 افراد ڈوب گئے۔