28 جولائی ، 2023 
سیریز جیتنے کے بعد بابر کا ساتھی کرکٹرز سے خطاب، سرفراز کی تعریف کن الفاظ میں کی؟
28 جولائی ، 2023
سری لنکا کیخلاف ٹیسٹ سیریز جیتنے کے بعد پاکستان کرکٹ ٹیم کے کپتان بابر اعظم نے ڈریسنگ روم میں ساتھی کرکٹرز سے خطاب کیا اور ان کی کارکردگی کو سراہا۔
پاکستان کرکٹ ٹیم کے کپتان بابر اعظم نے ڈریسنگ روم میں ساتھی کرکٹرز سے خطاب کیا اور کہا کہ سری لنکا میں ٹیسٹ سیریز جیتنا بہت مشکل ہوتا ہے، کسی ایک کی وجہ سے نہیں پوری ٹیم کی کوشش سے کامیابی ملی ہے۔
بابر اعظم نے کہا کہ ’سیفی بھائی، آپ کھیلنا چاہتے تھے مگر آپ کی صحت ہمارے لیے اہم تھی، سرفراز آپ کی یہی بات اچھی ہے کہ آپ ہمت نہیں ہارتے ہیں۔‘
بابر اعظم نے مزید کھلاڑیوں کو سراہتے ہوئے کہا کہ ’نومی بھائی، ویل بولڈ! جیسی آپ نے بولنگ کی، ایسا ہی ہمیں چاہیے تھا، شاہین اور نسیم نے بھی زبردست بولنگ کی، نئے بال سے زیادہ جو پرانے گیند سے بولنگ کی وہ زبردست رہی۔‘
کپتان نے یہ بھی کہا کہ یہ سب کچھ ہم نے کیا، آئندہ بھی ہم ہی کریں گے، ہمیں کسی ایک پر انحصار نہیں کرنا، سب کو مل کر کرکے دکھانا ہے، یہ نہیں سوچنا کہ دوسرا کردے گا، خود سے کہنا ہے کہ ہم کریں گے، ہم نے جیسی کرکٹ کھیلی ہے، ہم پوری سیریز میں چھائے رہے اور جو ہم نے سری لنکا میں کیا ہے، ہم نے ایسا ہی کرتے رہنا ہے۔
بابر اعظم اپنے خطاب میں کہا کہ سری لنکا میں اس سے پہلے ان کے اسپنرز کو کسی نے ایسے نہیں کھیلا، سعود اور عبداللہ نے بھی بہترین کارکردگی کا مظاہرہ کیا، ہر وقت ایک جیسا نہیں ہوتا، کبھی جو سوچتے ہیں، ویسا نہیں ہوپاتا، شان مسعود نے اپنی محنت اور اپنا اعتماد نہیں چھوڑا، برے وقت سے نکلنا ہر پلیئر کو آتا ہے، اسمارٹ کرکٹر وہی ہے جو اس سے جلد نکلتا ہے۔
