پاکستان ورلڈکپ سیمی فائنل میں جگہ بنائے گی: سابق آسٹریلوی کرکٹر کی پیشگوئی

آسٹریلین کرکٹ ٹیم کے سابق فاسٹ بولر اور  سابق کوچ پاکستان کرکٹ ٹیم جیف لاسن کا کہنا ہےکہ ورلڈ کپ میں پاکستان کرکٹ ٹیم کے اچھے چانسز ہیں،سیمی فائنل میں جگہ بنائے گی ۔

جیف لاسن نے نیشنل کرکٹ اکیڈمی لاہور میں لگائے جانے والے ایج گروپ کوچنگ کیمپ میں شرکت کی،اس موقع پر  جیو نیوز کے ساتھ خصوصی گفتگو  کرتے ہوئے جیف لاسن نے  کہا کہ   پاکستان کرکٹ ٹیم آسٹریلیا کے بعد دوسری ٹیم ہے جسے فالو کرتاہوں۔ 

پاکستان کے ورلڈ کپ میں چانسز ہیں ، یہ ورلڈ کپ بہت کلوز ہو گا : جیف لاسن 

46 ٹیسٹ اور 79 ون ڈے میچز کھیلنے والے جیف لاسن نے پاکستان میں دوبارہ آنے کو اردو میں زبردست قرار دیا،  پاکستان کے ساتھ کام کا تجربہ شیئر کرتے ہوئے جیف لاسن کا کہنا تھا کہ   نیشنل کرکٹ اکیڈمی میں نوجوان کرکٹرز کے ساتھ کام کر کے اچھا محسوس کیا، خاص طوپر انڈر 13 کرکٹرز کے ساتھ کام کیا اچھا لگا ان میں غیر معمولی ٹیلنٹ ہے۔

جیف لاسن کا کہنا تھا کہ میں دیکھتا ہوں کہ پاکستان ٹیم کیسے آگے بڑھ رہی ہے کوچنگ اسٹاف میں کون کون شامل ہیں، کھلاڑی کون کون ہیں ،میرے دور کے کھلاڑی اب کوچز بن چکے ہیں ان میں مصباح الحق بہت کامیاب ہیں ۔

بھارت میں ہونے والے ورلڈ کپ میں پاکستان کرکٹ ٹیم کے امکانات کے بارے میں جیف لاسن نے کہا کہ پاکستان کے ورلڈ کپ میں چانسز ہیں ، یہ ورلڈ کپ بہت کلوز ہو گا، کوئی ایک فیورٹ نہیں ہے ، 4، 5 ٹیمیں اچھا کھیلنے والے فیورٹ میں شامل ہوں گی۔ 

انھوں نے مزید کہا کہ  بر صغیر کنڈیشنز میں کھیلنے کا پاکستان ٹیم کو فائدہ ہو گا  جبکہ سیمی فائنل میں پہنچنے کے امکانات ہیں۔

جیف لاسن بھی بابر اعظم کے مداح

جیف لاسن  نے بتایا کہ میں  کپتان بابر اعظم کا  فین ہوں ، بابر اعظم دنیا کے بہترین کرکٹرز میں شامل ہیں وہ جب بھی کھیلنے کے لیے آتے ہیں خود کو بہتر بناتے ہیں ، کپتانی میں بھی وہ شاندار ہیں ، ان کے ساتھ محمد رضوان بھی باصلاحیت ہیں ، پاکستان ٹیم کی فاسٹ بولنگ اچھی ہے  اور  بھارتی کنڈیشنز کے مطابق اسپنرز بھی اچھے ہیں۔

پاکستان فاسٹ بولر کے پاس پیس ہے

انہوں نے مزید کہا کہ شاہین آفریدی ،حارث رؤف اور نسیم شاہ کے پاس بہت پیس ہے شاہین آفریدی دراز قد بھی ہیں ، ان تینوں فاسٹ بولرز کے پاس تجربہ اور ورائٹی ہے جس کا پاکستان ٹیم کو فائدہ ہو گا ۔