06 اگست ، 2023 
ایلون مسک کا ایک بار پھر مارک زکربرگ سے کیج فائٹ کا عندیہ
06 اگست ، 2023
ٹیسلا، اسپیس ایکس اور ایکس (جسے پہلے ٹوئٹر کہا جاتا تھا) کے مالک ایلون مسک نے ایک بار پھر میٹا کے چیف ایگزیکٹو مارک زکربرگ کے ساتھ مکسڈ مارشل آرٹ (ایم ایم اے) فائٹ کا عندیہ دیا ہے۔
انہوں نے ایک ایکس پوسٹ میں کہا کہ مارک زکربرگ سے مجوزہ کیج فائٹ ان کے سوشل میڈیا پلیٹ فارم پر لائیو اسٹریم کی جائے گی۔
6 اگست کو سوشل میڈیا پوسٹ میں ایلون مسک نے کہا کہ ایکس پر لائیو اسٹریم ہونے والی فائٹ سے اکٹھی ہونے والی تمام رقم فلاحی مقاصد کے لیے خرچ کی جائے گی۔
تاہم انہوں نے فائٹ کے حوالے سے مزید تفصیلات بتانے سے گریز کیا۔
اس سے قبل ایک اور میسج میں انہوں نے کہا تھا کہ وہ دن بھر وزن اٹھا کر اس فائٹ کے لیے تیاری کر رہے ہیں۔
خیال رہے کہ 20 جون کو ایلون مسک نے ٹوئٹر پر ایک صارف کی ٹوئٹ پر جواب دیتے ہوئے بظاہر مذاق میں مارک زکربرگ کو فائٹ کا چیلنج کیا تھا۔
جو جسٹو مارشل آرٹ کے ماہر مارک زکربرگ نے بھی 21 جون اس چیلنج کو قبول کرتے ہوئے انسٹاگرام اسٹوری میں لکھا کہ 'مجھے لوکیشن بھیجیں'۔
جس پر ایلون مسک نے اپنے جواب میں لاس ویگاس میں موجود وینیو Vegas Octagon کے بارے میں لکھا، یہ وہ جگہ ہے جہاں ایم ایم اے فائٹس ہوتی ہیں۔
اس کے چند دن بعد ایلون مسک نے بتایا تھا کہ انہوں نے کیج فائٹ کے لیے تربیت شروع کر دی ہے، مگر پھر اس حوالے سے کوئی اپ ڈیٹ سامنے نہیں آئی۔
اب انہوں نے ایک بار پھر فائٹ کے حوالے سے پیغامات پوسٹ کیے ہیں۔
مزید خبریں :
مقبولیت میں چیٹ جی پی ٹی کو پیچھے چھوڑ دینے والی نئی انٹرنیٹ ایپ
05 فروری ، 2025
2024 میں دنیا میں سب سے زیادہ فروخت ہونے والا فون کونسا رہا؟
04 فروری ، 2025
چیٹ جی پی ٹی میں ایک بہترین کارآمد ٹول کا اضافہ
03 فروری ، 2025
چین ایک اور اہم خلائی سنگ میل اپنے نام کرنے میں کامیاب
03 فروری ، 2025
بل گیٹس اپنے بچوں کیلئے کتنی دولت چھوڑ کر جائیں گے؟
03 فروری ، 2025
