ایپل نے بھارت میں آئی فون 15 سیریز کی پروڈکشن شروع کر دی

17 اگست ، 2023

آئی فون 15 سیریز ستمبر میں متعارف کرائے جانے کا امکان ہے / ٹوئٹر فوٹو

ایپل کی جانب سے کچھ سال سے بھارت اور ویتنام میں آئی فونز اور دیگر ڈیوائسز کو تیار کیا جا رہا ہے تاہم پروڈکشن کے لیے زیادہ انحصار چین پر کیا جاتا ہے۔

مگر اب امریکی کمپنی کی جانب سے چین پر انحصار کم کرتے ہوئے بھارت میں آئی فون 15 سیریز کی پروڈکشن بڑھانے پر کام کیا جارہا ہے۔

بلومبرگ کی ایک رپورٹ کے مطابق ایپل کے کنٹریکٹر کی جانب سے بھارت میں آئی فون 15 کی پروڈکشن شروع کر دی گئی ہے۔

بھارت میں نئے آئی فونز کی پروڈکشن اس وقت شروع کی گئی جب جولائی میں چین میں ان کی تیاری کا آغاز ہوا تھا۔

یہ پہلی بار ہے جب نئے آئی فونز کی پروڈکشن بیک وقت 2 ممالک میں ہو رہی ہے۔

گزشتہ سال چین میں کووڈ کی وبا اور دیگر وجوہات کے باعث کارخانے بند رہنے پر ایپل کی جانب سے بھارت میں آئی فون 14 سیریز کے کچھ ماڈلز تیار کیے گئے تھے۔

مگر اس سال ایپل کی جانب سے چین پر انحصار کم کیا جا رہا ہے۔

چند ماہ پہلے ایک رپورٹ میں بتایا گیا تھا کہ 2022 میں عالمی سطح پر تیار ہونے والے لگ بھگ 7 فیصد آئی فونز کی پروڈکشن بھارت میں ہوئی۔

اس سے قبل 2021 میں آئی فونز کی محض ایک فیصد پروڈکشن بھارت میں ہوئی تھی۔

امکان ہے کہ بھارت میں آئی فون 15 سیریز کی پروڈکشن سے یہ شرح نمایاں حد تک بڑھ جائے گی۔

رپورٹس کے مطابق مستقبل قریب میں چین اور تائیوان میں آئی فونز کی پروڈکشن جاری رہے گی کیونکہ وہاں پروڈکشن کی لاگت کم ہے، مگر بتدریج دیگر ممالک میں پروڈکشن کو بڑھایا جائے گا۔