20 ستمبر ، 2023 
پی پی کی باتیں سنی سنائی ہیں،فیلڈ تیار ہی نہیں تو لیول کس طرح ہوگی: خواجہ آصف
20 ستمبر ، 2023
مسلم لیگ ن کے رہنما خواجہ آصف نے کہا ہے کہ پنجاب سے متعلق پی پی کی باتیں سنی سنائی ہیں، ابھی فیلڈ تیار ہی نہیں ہوئی تو لیول کس طرح ہوگی؟
جیو نیوز کے پروگرام آج شاہزیب خانزادہ کے ساتھ بات چیت کرتے ہوئے انہوں نے کہا کہ اتحادی حکومت میں 14 مہینےعزت سے گزارے، خواہش ہے الیکشن بھی بطور اتحادی لڑیں۔
خواجہ آصف کا کہنا تھا کہ ن لیگ کا حکومت میں کوئی عمل دخل نہیں، آصف زرداری کی خواہش کا احترام ہے، ہماری بھی وہی خواہش ہے۔ پیپلز پارٹی کا فواد حسن فواد اور احد چیمہ کا رشتہ ہم سے جوڑنا درست نہیں۔
ان کا کہنا تھا کہ سندھ کے بارے میں تاثر ہے کہ تعیناتیاں پیپلز پارٹی کی مرضی سے ہوتی ہیں۔
خیال رہے کہ لاہور میں میڈیا سے گفتگو کرتے ہوئے چیئرمین پیپلز پارٹی بلاول بھٹو زرداری نے کہا تھا کہ لیول پلیئنگ فیلڈ کی بات اب سب کو نظر آ رہی ہے اور لیول پلیئنگ فیلڈ کا مطالبہ مسلم لیگ (ن) کے ساتھ ہے لہٰذا بہتر ہوتا لیول پلیئنگ فیلڈ کے معاملے کو پی ڈی ایم میں شامل جماعتوں کی جانب سے ایڈریس کیا جاتا۔
بلاول بھٹو زرداری نے کہا کہ الیکشن کے شیڈول کا اعلان کرنے کا اختیار الیکشن کمیشن کے پاس ہے لہٰذا الیکشن کمیشن فوری طور پر الیکشن شیڈول جاری کرے۔
