سابق پروٹیز پیسر ڈیل اسٹین نے ورلڈکپ کی فائنلسٹ ٹیموں سے متعلق کیا پیشگوئی کی؟

جنوبی افریقا کے سابق پیسر ڈیل اسٹین نے ورلڈکپ کے لیے اپنی فائنلسٹ ٹیموں کے حوالے سے پیشگوئی کی ہے۔

ورلڈ کپ کا آغاز چند روز بعد بھارت میں ہونے جا رہا ہے جس میں شرکت کے لیے پاکستان سمیت مختلف ٹیمیں بھارت پہنچ چکی ہیں۔

ورلڈکپ میں پاکستان اپنے سفر کا باقاعدہ آغاز 6 اکتوبر سے نیدرلینڈ کے خلاف میچ سے کرے گا جبکہ پاکستان اور بھارت کا ٹاکرا 14 اکتوبر کو احمد آباد میں ہو گا۔

ورلڈکپ سے قبل مختلف سابق کرکٹرز اور اسپورٹس پر نظر رکھنے والے صحافیوں کی جانب سے اپنی فیورٹ ٹیموں کے حوالے سے پیشگوئی کی جا رہی ہے اور زیادہ تر کھلاڑیوں نے پاکستان کو اپنی سیمی فائنلسٹ ٹیموں میں شامل کیا ہے۔

سابق جنوبی افریقی کپتان اے بی ڈویلیئرز اور سابق افریقی رنز مشین ہاشم آملہ بھی اپنی سیمی فائنلسٹ ٹیموں سے متعلق پیشگوئی کر چکے ہیں۔

اب جنوبی افریقا کے سابق فاسٹ بولر ڈیل اسٹین نے ورلڈکپ کے لیے اپنی فائنلسٹ ٹیموں سے متعلق پیشگوئی کی ہے۔

ڈیل اسٹین نے اسٹار اسپورٹس سے گفتگو کرتے ہوئے کہا کہ یہ بہت مشکل فیصلہ ہے لیکن میرا دل تو کہتا ہے کہ جنوبی افریقا فائنل میں جائے کیونکہ بہت سارے پروٹیز کرکٹرز آئی پی ایل کھیلتے ہیں اور بھارت میں باقاعدگی کے ساتھ کھیلتے چلے آ رہے ہیں۔

انہوں نے مزید کہا کہ جنوبی افریقا کے پاس ڈیوڈ ملر اور ہنرچ کلیسن جیسے بیٹرز ہیں،ا س کے علاوہ پروٹیز کے پاس کگیسو ربادا جیسا بولر ہے جو بھارت میں باقاعدگی سے کرکٹ کھیل رہا ہے لیکن اس سب کے باوجود سابق جنوبی افریقی اسپیڈ گن پروٹیز ٹیم کی حمایت کے معاملے میں تذبذب کا شکار نظر آئے۔

دوسری جانب سابق بھارتی آل راؤنڈر عرفان پٹھان نے اپنی فائنلسٹ ٹیموں کے حوالے سے بتاتے ہوئے کہا کہ انگلینڈ کی بیٹنگ لائن بہت اچھی ہے لیکن مجھے یقین ہے کہ فائنل بھارت اور جنوبی افریقا کی ٹیموں کے درمیان ہو گا۔

عرفان پٹھان کا کہنا تھا میرا دل کہتا ہے کہ اس ورلڈکپ میں جنوبی افریقا بہت اچھا کرے گا، انگلینڈ کی ٹیم بھی بہت اچھی ہے اور وہ بھی فائنلسٹ ٹیموں میں شامل ہو سکتی ہے لیکن میرا دل جنوبی افریقا کے ساتھ ہے۔